Mizoram PWD in kawngpui KM 845-a thui sial mek

Mizoram PWD chuan tun dinhmunah kawngpui thar, a vai a belh-khawmin  kilometre 845.18 sial mek a nih thu an sawi.

Mizoram PWD hotute sawi danin tun dinhmunah Mizoram chhungah Sawrkar laipui scheme leh a kaihhnawih hrang hrangte atangin kawngpui thar sial hna thawh mek a ni a, heng kawngpui an sial hrang hrang zingah hian PMGSY hnuaia hnathawh tam berin PMGSY scheme hnuaiah hian kawng 26, kilometer 410 a thui cheng vbc. 530.85 man thawh mek a nih thu sawiin, heng an hnathawh ah hian za zela 86.26 zawh a nih tawh thu an sawi a ni. Hei bakah hian NABARD loan hnuaiah lamlian kilometre 234.22 a thui chu cheng vbc. 547.22 man sial mek a nih thu sawi bawkin, he hna hi za zela 77.11 zawh a ni tawh tih an sawi a. PM-Devine hnuaiah pawh Bamboo Link Road pahnih, kilometre 59 a thui siamna atan cheng vbc.100 hmuh a ni tawh bawk a, hemi hnuaia hna an thawh hi za zela 26.78 thawh zawh a ni tawh tih an sawi bawk a. Central Road Fund hnuaiah pawh lamlian panga, kilometer 89.62 a thui siamna atan cheng vbc. 302.33 an hmuh thu leh hemi hnuaia an hnathawh ah hian za zela 78.32 zawh a nih tawh thu an sawi bawk. 

Mizoram PWD chuan National Highway hi kilometer 590.29 a thui an enkawl mek a, hemi ah hian kilometer 79.20-a thui chei thatna atan cheng vbc. 160 hmuh a ni a, hna hi za zela 28 zawh tawh a ni a, State pawisa Plan Fund 5054  hnuaiah kawngpui kilometer 580-a thui leh State pawisa tho Mizoram Road Fund hnuaiah cheng nuai 3054 hmangin kawngpui kilometer 371.92-a thui chei that mek a ni a, tun Thal chhung ngeia zawh hman tum a ni bawk.