MNF President in sawrkar hnathawk hlawh leh thildang pe thuai turin sawrkar a phut

MNF President Zoramthanga chuan sawrkar hnathawk hlawh leh thildang pe thuai tura sawrkar a phut thu a sawi.

MNF Party hian nimin khan Aizawl-a Mizo Hnam Run-ah kumin (2024) atan Mizo Hnam Run kharna hun hmangin, MNF-in Ni pawimawh tak tak 6 a neih zinga pakhat 'Exodus Day' an hmang a. He hunah hian MNF President Zoramthanga chuan sawrkar tharah sum leng vak a van thu sawiin, Mizoram sawrkarin ni 100 inhlawhna a bat sak reng chu pe thuai tura a phut thu leh MNF hunlai chuan Central atangin sum sanction lo mahse; Advance-a an pek zel thu a sawi a, Mipuiin Krismas leh kumthar hlim taka an hman theih nan sawrkar hnathawk hlawh leh thil dang dang pe thuai tura sawrkar a phut thu a sawi a ni.

MNF President Zoramthanga chuan Exodus Day lo chhuah dan he hunah hian sawiin, December ni 16, 1971-ah East Pakistan khawpui Dhaka, tuna Bangladesh ni ta hi India-in a lak tuma MNF Headquarters Rangamati, Tuipui zau tak hual vel kara awm Meilawng pasarih hmanga mak tak maia Pathian in a hruai chhuahna Ni a nih thu a sawi a. “December ni 16 hi India sipaite tan hnehna ni ropui, an hmelma Pakistan tlawmna ni 'Vijay Diwas' anih rualin MNF sipaite tan pawh India lak atanga chhanchhuahna ni ropui a ni a. Harsatna su turin Pathian in MNF hi a tir atangin a din a, a sutkian tir thin a, kawng lakah a kalsan lovang,” a ti a. Rambuai kha Pathian ruat anih thu sawiin, “Pu Laldenga khan buai lova Shillong-ah dawhkan kila sawiho pui a tum laiin, Assam Chief Minister khan inremna bawhchhiain sipai a rawn tir lui a, kan ram a buai ta a ni,” a ti a. “Mihring tumna leh remruatna zawng zawngte kha lo hlawhtling se, Vawiin a kan inremna ang hi a chhuak lo ang. Kan hlawhchhamnat e kha Pathian in Zoram tundin a tumna zawk a ni,” tiin, Pakistan President Ayub Khan remtihnain Pakistan-a an chhuk thu leh, thinglubul a dan chepna atanga an chhuah zalenna (Exodus Day) chu Laldenga leh a hote remruatna ni lovin, Pathian remruat a nih thu a sawi bawk.

Nimin-a he hun hman hi MNF Vice President Vanlalzawma chuan kaihruaiin MNF Treasurer Lalruatkima chuan VC/LC inthlan kan hmachhawn turah MNF party inbuatsaihna hrang hrangte a puang bawk. Mizo Hnam Run hi January 13, 2025-ah hawn leh a ni ang.