Paragliding Accuracy Championship leh Air Sports Festival kharna Chief Minister hovin neih a ni

Serchhip-a neih ‘International Paragliding Accuracy Championship leh Air Sports Festival 2024’ chu Inrinni khan zawhfel niin a kharna hun hi Chief Minister Lalduhoma chuan a hmanpui a ni.

Serchhip Mat phai Landing Side-a International Paragliding Accuracy Championship leh Air Sports Festival 2024 kharna hunah hian Chief Minister Lalduhoma chuan infiammite tumruhna leh inpekna fakin he hun hi ram dangte nena inpawhna leh inthianthatna siamna kawnga a pawi-mawh thu a sawi a, Mizoram chu Adventure Tourism hmunpui a nih theih dan a tarlang bawk. Serchhip khawpui boruak muanawm, mawi leh hmuhnawm takah Paragliding atana hmun tha tak a awm chu lawmawm a tih thu Bialtu MLA ni bawk Lalduhoma chuan sawiin, “Helai hmun hi India rama Adventure Sports atana hmun tha ber pawl a nih avangin Adventure Tourism hmasawnna atana hmun pawimawh tak a ni,” a ti a. Tualchhung Mizo Pilot-te thawhrimna chu lawmawm a tih thu leh a chhuan thu Chief Minister chuan sawi bawkin, heng Pilot te inpekna leh thiamna te bakah Mizoram Sawrkar, MASA, FAI leh Serchhip mipuite thawhhona tha tak avangin he Championship hi a hlawhtling a ni, a ti bawk.

He hunah hian khual zahawm Tourism Minister Lalrinpuii chuan International Paragliding Accuracy Championship hlawhtlinna tura thawktu zawng zawng - Serchhip DC hoa din Organising Committee te, Tourism Department te, MASA te, Serchhip mipuite leh tha leh zung thawhtu zawng zawng chungah lawmthu a sawi a. Adventure Tourism a tui tak leh hmang hria Chief Minister kan nei chu an vannei takzet tih sawiin, “A zarah Vawiin ah a bial chhung ngeiah khawvel huap inelna Mizoram in kan thleng thei a ni,” a ti a. Ram dang atanga lo kalte chungah lawmthu sawiin, Championship chu anmahni vanga hlawhtling a ni a, an rama an haw leh hunah pawh Mizoram hrereng turin a chah a ni.

He Championship-ah hian ram paruk- India, Korea, Kazakhstan, Spain, Indonesia, leh Nepal atangin infiammi mi 30 an tel a, he hunah hian a tithate hnenah lawmman semin Men’s Category-ah Aman Thapa (Nepal) chu pakhatna a ni a, Women’s Category-ah Eun Young Cho (Korea) chu pakhatna niin Team Category-ah Indo David Team, Indonesia leh Spain inkawp chu pakhatna an ni bawk a. National Category Men’s-ah Akhsay Kumar chu pakhatna niin National Category Women’s-ah Alisha Alisha chu pakhatna a ni bawk. Category tinah hian pakhatna in cheng nuai hnih dawngin pahnihna in Rs. 1,50,000/- leh pathumna in Rs. 1,00,000/- an dawng bawk a ni.

He intihsiakna kharna pual hian Inrinni zan khan Serchhip Bazar-ah Free Concert neih zui a ni a, zaithiam hrang hrangte zaiin mipuiin an hlut hle a ni.