Ni 100 inhlawhna la pek loh chhan sawifiah

Mizoram sawrkar-a Rural Development Department chuan ni 100 inhlawhna mipuite hnena pek a la nih loh chungchang an sawifiah.

Hemi chungchanga sawrkar thuchhuah chuan MGNREGS hnuaia mipuite inhlawhna chu thla 2 lai mipuiin an dawng tawh lo tih tarlangin, “Mipui inhlawhna te hi Mizoram Sawrkar kaltlang lo in Direct-in mipui Account-ah a lut thin a. Central Sawrkar hian December ni 5 khan mipuite hlawh tur hi Release Order a issue tawh a. Amaherawh chu Central Ministry lama a pawisa ber pechhuaktu ber, Pay and Accounts Office lam te’n technical issue an neih avangin Vawiin thlengin mipuite inhlawhna an Account-ah a la lut thei lo,” an ti a. Mizorama thawktute chuan mipuite’n an thawh zawh atanga ni 8 chhungin an hlawh tur siamfelin tihfel ngaite  an tifel nghal zel tih pawh tarlangin, “Tun tum harsatna hi chu Central Ministry lama pawisa pechhuaktute lamah khawl lama harsatna an neih vang a ni a, inbiakpawh reng a ni a, reilote-ah siam zawh an in bei sei a ni. Mipuiten harsatna an tawh avangin Sawrkar chuan pawi a ti takzet a, an harsatna sukiang turin theihtawp a chhuah mek a,  Krismas hmaa Mipuite Account-a a luh fel hman vek beisei a ni e,” an ti a ni.