Mizoram-a Jail 10 awm ah tang thei zat aiin tang 257 in an tam zawk

Tun thla ni 12 thleng khan Mizoram a Jail hrang hrang 10-ah mi tang 1,643 an awm a, tang awm thei zat tura ruahman aia mi tang tamna chu 257 a tling a. Mizoram-a Jail hrang hrangah hian damchhunga Jail tang tura chungthu rel sak mi 54 an awm mek bawk a ni.

Prison Department chhinchhiahna atanga a lan danin Mizoram-a District hrang hrangah Jail 10 awmin heng Jail hrang hrangah hian mi 1,386 awm theihna a nih laiin Ningani kalta, tun thla ni 12 thlenga tang awm zat chu 1,643 a ni a, Mizoram-a Jail lian ber Aizawl-a Central Jail chu mi tang tamna ber a ni a, Central Jail hi mi tang 438 awm theihna a nih laiin December 12, 2024 thlenga tang awm zat chu mi 799 an tling a, tang awm thei zat aia tang an tamna hi  mi 361 zet an ni a ni.

Hei bakah hian mi tang 96 awm theihna, Aizawl-a Central Women Jail-ah pawh tang 136 an awm mek a. District Jail, Aizawl pawh mi tang 90 awm theihna tura ruahman a nih laiin tang 110  an awm bawk a. Mi tang 109 awm theihna tura ruahman District Jail, Lunglei-ah tang 117 an awm mek bakah District Jail, Siaha-ah tang 75 awmin he Jail hi tang 92 awm theihna tura ruahman a ni a. Tang 105 awm theihna tura ruahman District Jail, Champhai-ah tang 145 awm mek bawkin, District Jail, Kolasib-ah tang 134 awm theihnaah mi 79 an awm bawk a ni.

District Jail, Lawngtlai-ah tang 35 awm mekin he Jail hi mi 98 awm theihna a ni bawk a. District Jail, Serchhip chu mi tang 128 awm theihna tura ruahman niin tang mi 73 an awm bawk a, mi tang 96 awm theihna tura ruahman District Jail, Mamit-ah 74 an awm mek bawk.

Hetihlai hian Mizoram-a Jail hrang hrangah pawikhawihna avanga thiamloh chantir a damchhung tang tur mi 54 an awm mek a, heng damchhunga Jail tang tur mi 54-te hi Mipa vek an ni a, an zinga mi 53-te chu Central Jail, Aizawl-a tang niin midang pakhat chu District Jail, Lawng-tlai-a tang a ni thung.

Mizoram-a Jail thenkhat-a tang mek te tan hian thiamthil zirna te buatsaih ni bawkin Jail atanga an chhuah hnuah eizawnna nghet an neih theih nan he hmalakna hi kalpui a ni