VC tern pawhtawi khinna kumthar ah ngaihtuah dawn

All Mizoram Village Council Association (AMVCA) in Village Council term pawh tawi chungchanga Gauhati High Court-a Mizoram sawrkar an khinna chu kumthar-a High Court hawn a nih veleh ngaihtuah a ni dawn.

AMVCA President K. Lalngaizuala sawi danin Gauhati High Court, Aizawl Bench-a tun thla ni 6-a sawrkar khinna tur an thehluh chu sawrkar atanga VC term pawhtawina order hmasa zawk, thla hmasa ni 20-a tihchhuah khinna tur a ni a. Sawrkarin Order dang, thla hmasa ni 21-a a tihchhuahin Order hmasa a luahlan avangin khin theih a ni lo a, Order hmasa an khinna tur chu niminpiah khan hnuk-dawkin Order hnuhnung zawk khinna tur chu niminpiah vek khan thehluh a ni tih a sawi a. Rang taka ngaihtuah an dil nachungin Court chuan kumthar a High Court hawn hun, January ni 13 emaw ni 14-ah emaw ngaihtuah tura a tih tluk tak thu a sawi a ni. AMVCA President chuan tha thlah lovin High Court-a case an kalpui chu inlungrual takin a tawp thleng beih tumin hma an lak chhunzawm zel tih a sawi bawk.

Village Council term kal lai tih tawi a nih thu hi Local Administration Department chuan thuchhuah siamin November ni 21 khan a lo tar-lang tawh a, hemi ang hian Village Council term dinglai chu nakum February ni 19-ah a tawp dawn thu an lo puang tawh a. Hei bakah hian Sawrkar in Financial Year thar lo awm tura inthlan hautak tak tak pali awm tur tih zangkhaina tur leh sum renchem a duh avangin Village Council term kallai chu thla 6 in a pawt tawi tih LAD Minister C. Lalsawivunga chuan a lo sawi tawh bawk a ni.

Hetihlai hian Village Council Inthlanpui nei turin inbuatsaihna kalpui chhoh tan mek niin Electoral Roll ennawn hna chu District hrang hrangah kalpui chhoh mek a ni a, kumthar January 8-ah Final Roll hi tarchhuah tur a ni ang.