Kawng chhia siamin Aizawl Falkland-ah hnatlang nei

Aizawl-a Falkland khawtlang chuan Inrinni khan an Vengchhung kawng, World Bank Road ti-a sawi a lei tlahniam chu hnatlang in siamthat hna an thawk.

Falkland Local Council huaihawtin Falkland khawtlang chuan he hnatlang hi an nei a, Cyclone Remal avanga an Vengchhung kawng, State Highway ni bawk, chhim lam mamawh chawk luhna ber chu kawng zat ve zetin a tlahniam tih an sawi a, Falkland Local Council leh All NGO te, DC leh PWD hotute nen vawi tam en leh sawikhawm ni tawh mahse, siamthat leh hmalakna a la awm loh avangin khawtlang hruaitu leh mipui ten hnatlanga siam mai an rel ta nia thudawn a ni.

Helai kawng hi tunhnai khan a chhe zual nasa hle a, Two Wheeler a chetsualna a nasa in, Truck te pawh a leh mai hlauhawm khawpa a awm tak avangin khawtlang mipuite sum thawhkhawm hmangin he hnatlang hi neih a ni a. Falkland khawtlang chuan an Vengchhung kawng an siam chungchangah te, chhiatna nasa zawk leh nunna hial te chan palh theih a nih avangin mipui nunphung an tih khaihlakna ah mipuite hriatthiamna an ngen thu an sawi bawk a ni.