Thuneitute hnena report hi hek a ni lo - END Minister

Excise & Narcotics Minister Lalnghinglova Hmar chuan, “Thenawm leh hmelhriat ruihhlo zuar, thuneitute hnena report hi hek a ni lo a, ram leh hnam tana hna tangkai thawk an ni zawk,” a ti.

Excise & Narcotics Minister ho hian Zirtawpni khan Hnahthial District chhunga Kohhran hruaitute, tlawmngai pawl hruaitute, MJA member te leh Hnahthial District chhunga Head of Office te chu Hnahthial DC Meeting Hall-ah thukhawmin ruihhlo do kawnga hmalak dan tur an sawiho a. He hunah hian Excise Minister Lalnghinglova Hmar chuan Ruihhlo tih tanna bulpui ber, a Gateway Substance chu zuk leh hmuam a ni tih sawiin, “Heng ah te hian inhrilhhriatna (awareness) kalpui nasat zual a pawimawh a ni,” a ti a. Awareness hi zirlai naupangte ah bul tanin zirtirtute chuan nitin an zirlaite hnenah tawngkam hnih khat talin ruihhlo that lohna hi lo sawi thin se a duh thu a sawi bawk a ni.

END Minister Lalnghinglova Hmar ho hian Inrinni khan Lunglei-ah ruihhlo do kalpui mek dan thlirhona leh hmalak zui zel dan tur sawiho a ni bawk a, he hunah hian END Minister chuan ruihhlo dona ah kohhran, NGO leh sawrkar tanhona chuan awmzia a nei ngei ang tih sawiin, “Sawrkar, NGO, kohhran leh khawtlangin mahni hma zawnah kan thiam dan danin ruihhlo chu kan do theuh va, sawt zawka kan do theih nan kan hma lakna inhriat tawnpui a tul,” a ti a, Ruihhlo chu kan beih loh chuan kan tlawm tawh tihna a ni a, kan do loh chuan min hneh dawn a ni tiin, “Ram chhanna thil a nih avangin tih tak taka beih a ngai a ni,” a ti a. Ruihhlo dona kawngah theihtawp chhuah zel turin kal khawmte chu a chah bawk.