Kum khat chhunga hmalakna ah ZPM Thalai an lawm

ZPM Thalaite chuan an Party in kum khat (1) chhung rorelna an chan chhunga Mizoram-ah Administrative Reform leh Mipuite Moral Reform tamtak an thlentir hman chu lawmawm an tih thu an sawi.

Nimin a thuchhuah an siamah ZPM Thalaite chuan ZPM Kalphungthar, Mipui Sawrkar-ah Mipuite tana rawngbawltu kan Sawrkar hnathawkte pawh an thla a muang hle nia sawiin, Sawrkar hmasa lama an Dearness Allowance (DA) an tihpun an pek theih tawh loh pawh Sawrkar thar chuan a hnathawkte ngaihsaki, a pe thei ta chu lawmawm an tih thu an sawi a. Sawrkar hnathawk Pension-te tan pawh Sawrkar chuan nasa taka hma lain Sawrkar hmasa ten kum 5 chhunga Pension Case 974 chauh an tihfel theih laiin ZPM Mipui Sawrkar chuan kum khat chhungin Pension case 7237 lai a chinfel sak thei niin an sawi bawk.

Hei bakah hian ZPM Kalphungthar, Mipui Sawrkar chuan Hmeithai, Rualbanlote leh kan hnam rohlû kum lam Upa te tan theihtawpa hma la zelin tunhma a thlatin Rs. 100/- an dawn thin pawh tipungin Rs. 1,000 /- lai an dawng ve thei ta niin an sawi a, “Hmeithai leh pachhiate tana ding tlat ZPM Kalphungthar, Mipui Sawrkar hi ZPM Thalai chuan a thlawp tlat zel dawn a ni,” an ti bawk.