Serchhip District-a raltlan awm mek te hnenah naktuk atangin a thlawna Buhfai sem tum a ni
Serchhip DC Office atanga LENKAWL in thu a dawn danin sawrkar laipui ruahmanna anga Serchhip District-a raltlan awm mek te hnena a thlawna buhfai sem tur hi Serchhip Kudam rawn phurhthlen a nih hnuah naktuk khian semchhuah tan tum a ni a, buhfai sem hi Serchhip Sub-Hqrs. YMA chuan an buaipui dawn a, naktuk chawhnu dar 1:00-ah Serchhip District Bawrhsap chuan DC Office kawt atangin Serchhip, Keitum, Bungtlang, Thenzawl, Khawlailung, North Vanlaiphai, East Lungdar, Sailulak leh Bawktlang-a sem turte chu a vailiam dawn a. Heng khuaa raltlan tanpui ngai thlanchhuah te hnenah mi pakhat tan kg. 21 zela semchhuah tur a ni anga, Baktawng, Khumtung, Vanchengte leh Chhingchhip Mualpui a raltlan tanpui ngai thlanchhuah te hnena buhfai sem tur chu Sub-Hqrs. YMA leh an khuaa YMA hruaitu ten kg. 21 bawkin an sem ang.
Raltlan te hnena buhfai semchhuah tur hi Supply Kudam atanga phurhchhuah a nih dawnin DCSO leh a Staff ten buk vekin Kudam atanga phurhchhuah bakah a bang la awm zat chu mumal taka Stock Register siamin an chhinchhiah anga, Buhfai sem zawh a nih velah District Bawrhsap hnenah report pein Sub-Hqrs. YMA leh Branch YMA te hian raltlan te hnena buhfai an sem rual hian an pe/dawng ngei tih lantirna receipt an la bawk anga, buhfai sem hi tun thla ni 23-ah chuan zofel vek hman tura ruahman a ni.
Chhinchhiahna atanga a lan danin tun dinhmunah Serchhip District-ah hian raltlan mi 558 an awm mek a, heng zinga 424 te chu Myanmar atanga raltlan rawn lut te niin Veng leh khaw 22-ah an awm mek a. Manipur atanga raltlan rawn lut mi 30 awmin Veng leh khua 4-ah an awm bawk a, Bangladesh atanga raltlan rawn lut mi 104 awmin Thenzawl East-ah an awm a ni.
Comments
Post a Comment