Kum khat chhung chauhin ram rorelna ah danglamna tam tak a thleng tawh - Chief Minister

Chief Minister Lalduhoma chuan, Kalphung thar mipui Sawrkar in kumkhat chhung chauh pawhin ram rorelnaah danglamna tam tak a thlen tawh thu sawiin, “Kan ram rorelna kalphung a lo dik theihna turin kawng tam takin hma kan la mek bawk,” a ti.

ZPM Party in kumin atana an Party Office kharna hun nimin-a an hman ah Chief Minister Lalduhoma chuan sawrkar kalphung dik chu kum tam tak an lo aupui tawh tih sawiin, “Pathian leh mipuite zarah Sawrkarna chu kan lo chang ta a, engtiang takin nge he Kalphungthar mipui Sawrkar hian ram rorelnaah danglamna a thlen tih hi Zoram mipuite hian kan ngaihven a tul hle a ni,” a ti a. “Kum khat chhungin Mizoram Legislative Assembly-ah hian kan Speaker kaihruainain Bill 46 kan Passed tawh a, Dan siamthat ngai leh herrem ngai engemawzat kan siamtha tawh bawk a ni,” tiin Dan thar ‘Mizoram Private Placement Agencies Regulation Bill 2024’ chu an duan mek thu a sawi bawk. Chief Minister chuan Labour Laws 44 vel kan neih mek chu mumal zawkin Dan 4-ah an khaikhawm dawn tih sawiin, “Zu khap burna dan (Mizoram Liquor Prohibition Act) pawh uluk tak leh fimkhur taka ennawn mek a ni a, ramchhunga thil dehchhuahte ngaihlut a nih theih nan Mizoram Preferencial Store Purchase Rule 1994 pawh kan ennawn mek bawk, chumi hrulah chuan thil siamchhuahna hmun ngei atanga hmanraw tha leh tlawm zawk kan lei theih nan Mizoram Procurement Preference Policy 1994 pawh siam rem mek a ni,” a ti.

Industrial Policy 2024 an duan mek thu te, Right to Public Service Act an siamthat thu leh Village Council Act pawh a thar siam a nih dawn thu Chief Minister chuan sawiin, Autonomous District Council te pawh ngaihsakin Dan engemaw zat siamthat sak an nih tawh thu a sawi a. “Heng kan hmalakna reng reng hian a tum ber chu Ram rorelnaa Kalphung dik (Administrative reform) a nih rualin, chhungril a dikna (Moral Reform) kan neih theihna tura kalphung thar mipui Sawrkar hmalakna a ni a, heng bakah hian Aikal lak tihtawp te, Sawrkar hnathawk ten hunbi an vawn dikna turte bakah inrenchemna kawngah theihtawpin hma kan la a, kan ram rorelna kalphung a lo dik theihna turin kawng tam takin hma kan la mek bawk a, kum khat chhungin Kalphung thar mipui Sawrkar hian ram rorelnaah danglamna tam tak kan thlen tawh a ni,” a ti bawk.