MBOCWWB-ah mi 19,487 te inziaklut tawh

Mizoram chhunga mahni kutkawih thiamna leh insakna bakah hmasawnna hnathawh kawnga nitina inhlawhfa thin ten hamthatna an neih theihna atana din, Mizoram Building and Other Construction Workers Welfare Board (MBOCWWB) hnuaia Welfare Fund siamah mi 19,487 an inziaklut tawh.

MBOCWWB enkawltu Labour Employment Skill Development and Entrepreneurship Department hotute chuan MBOCWWB Welfare Fund hnuaiah hian India khua leh tui nihna dik tak nei kum 18 atanga kum 60 inkar, kumkhat chhunga ni 90 tal inhlawhfa te chu member an nih theih thu an sawi a, member zinga hmeichhe nau nei an awmin a lawmpuina atan MBOCWWB chuan Rs. 10,000/- an pek thin thu leh hei hian fa pahnih an neih thleng a huam thu sawiin, he lawmpuina bik hi nau neih atanga thla ruk thleng a dil theih thu an sawi a, Welfare member kum 60 tling chinte tan thla tin pension Rs. 1000/- pek an nih thin thu te, kum 60 tlin hma a natna khirh tak emaw avanga hnathawk theilo tan thla tin pension Rs. 1000/- bakah an dinhmun a zirin cheng nuai khat thleng pek theih a nih thu an sawi bawk. 

LESDE Department hotute chuan MBOCWWB Welfare Fund chu huang zau taka duan a nih thu sawiin, Member hnathawka chesual an awmin damdawi In-a dahluh an nih chuan a luh ni atanga chhiarin nitin Rs. 1000/- zel an dawng thei ang a, natna khirh zual leh accident tawk an awm a nih chuan cheng nuai khat bakah Board-in a hmathatna dang a duan an dawn theih tur thu an sawi bawk. Heng bakah hian Welfare member fate lehkha zirna tanpuina pawh duan a nih thu LESDE Department hotute hian an sawi bawk.