Kumin ah Police leh END in ruihhlo man tam tawh

Kumin January thla atanga November, thla 11 chhung khan Mizoram Police leh Excise & Narcotics Department hnathawkte chuan ruihhlo chi hrang hrang tam tham tak an man tawh.

Department pahnih hotute sawi danin ruihhlo do kawnga danin thuneihna a pek Police leh Excise & Narcotics hnathawk te hian kumin-a thla 11 chhung hian Heroin kg. 121 leh gram 895 zet manin Methamphetamine pawh kg. 690 leh gram 53 zet a nih bakah Ganja kg. 880 leh gram 554 an man bawk a. Police hian kuminah Crystal Meth vawi 3 manin kg. 35 leh gram 155 a tling a. END lamin man an la nei lo thung a. Heng bakah hian khuh damdawi leh damdawi dang pawh thahnem tak an man a ni.

Mizoram Police-a IGP leh Chief Public Relations Officer Lalbiakthanga Khiangte sawi danin Police bik hian kumin a thla 11 kalta chhung khan ruihhlo chi hrang hrang cheng vbc. 201.47 hu an man a. Ruihhlo kaihhnawih ah thubuai 327 ziaklutin mi 448 an man a ni. Police hian Heroin kg. 77 leh gram 422 an man a, chu chu cheng vbc. 23.22 hu a chhut a ni a. Methamphetamine kg. 557 leh gram 424 manin cheng vbc. 72.46 hu ni a chhut a ni a. Crystal meth hi February, May leh July thla te khan manin a vaiin kg. 35 leh gram 155 a tling a, cheng vbc. 105.46 hu zet a chhut a ni.

Excise & Narcotics Department-a Joint Commissioner leh Department thupuangtu Peter Zohmingthanga chuan thla 11 kalta chhung khan Heroin kg. 44 leh gram 473, methamphetamine kg. 132 leh gram 629 bakah Ganja kg. 585 leh gram 629 an man thu a sawi a. Ruihhlo bakah hian Mizoram Liquor Prohibition Act 2019 tlawhchhanin rakzu litre 62,400 chuang leh a senchi tam tham tak an man a, dan bawhchhetu mi 6,725 an man bawk.