Kumin chhungin Dengue vei 719 hmu tawh

Kumin thla 11 (January atanga November thla inkar) chhung khan Mizoram-ah Dengue hri vei mi 719 hmuhchhuah a ni a, an zinga pakhat chu a thi.

Health & Family Welfare Department hnuai a State Vector Borne Disease Control Programme (SVBDCP) hotute sawi danin kumin-a thla 11 kalta chhung khan Mizoram-ah Dengue natna kai ni a inringhlel mi 8,562 thisen endik a ni a, an zinga mi 719 in he natna hi an vei tih hmuhchhuah a ni a. Hri kai hmuhchhuah zinga 503 te chu Aizawl District ami an ni a, Lunglei District-ah Dengue hri kai mi 176 leh Champhai District-ah mi 14 hmuhchhuah an ni bawk.

Dengue natna hi Mizoram-ah kum 2012 khan hmuhchuah tan a ni a, hemi kum hian hri kai mi 6 hmuhchhuah an ni a. Kumtin hmuhchhuah pungchho zelin kum 2020 leh kum 2021-a Covid-19 hri len lai khan tlem chho mah se kum 2022 khan mi 1,868-in he hri hi kaiin mi 5 laiin an thihpui a. Nikum 2023 kha Dengue hri hmuhchhuah an tam ber kum niin mi 12,949 thisen endik zinga mi 2,060-in kaiin mi pahnih in an thih phah bawk a, kumin-a mi pakhat thi nen Mizoram-a Dengue vanga thi zat hi an vaiin 8 an tling tawh a ni.

Dengue natna hi Thosi chi khat Aedes-in a put darh a ni a, hetiang Thosi hian chhunah mi a seh thin bakah Mizoram-ah a tam avangin mipuite chu fimkhur turin Health Department chuan an chah bawk a ni.