Cultural Festival hmang

Serchhip Sub-Hqrs. YMA leh Nehru Yuva Kendra (NYK) Serchhip District buatsaihin nizan hmasa khan Yuva Utsav hnuaiah Cultural Festival neih a ni.

Serchhip Sub-Hqrs. YMA Conference Hall-a Cultural Festival hi Serchhip Sub-Hqrs. YMA Asst. Secretary Zonunsanga Kawlni chuan hawngin, NYK leh Sub-Hqrs. YMA ten thawhhona tha tak an lo neih tawh thin thu leh tun tumah pawh hetiang hun an buatsaih leh thei chu lawmawm a tih thu a sawi a. India ramah thalaite chawikanna leh hmasawnna atan sawrkar laipui in kawng hrang hranga hma a lakna leh heng hmalakna hnuaiah Serchhip District-ah pawh nasa taka hmalak a nih dan te a sawi a. Mizoten thalai pawl tha tak leh tangkai tak YMA kan neih thu sawiin, he huna tel YMA Member te chu mahni awmna Branch ah theuh YMA hmalakna ah tel thin turin a chah a, chu chu YMA Member ten an mawhphurhna a nih thu a sawi bawk a. YMA chuan kawng hrang hrangah hma a lak thin thu pawh sawiin, Mizo hnam lam leh zai leh Mizo nun zemawi humhalh leh chawisan kawngah theihtawp chhuah zel a pawimawh thu a sawi bawk.

He Cultural Festival hman hi Sub-Hqrs. YMA Cultural Committee Chairman K. Lalhma-ngaihzuala chuan kaihruaiin YMA Branch 7 ten Cheraw, Tlanglam leh Chheih Lam te an entir a ni.