Assam Rifles hnathawk tha te hnenah Medal hlan

Mizoram Governor Dr. Hari Babu Kambhampati chuan Assam Rifles sipai zinga hna thawk tha zual thlanchhuah mi 35 te hnenah nimin khan chawimawina tangkapui, Governor's Gold Medal 15 leh Silver Medal 20 a hlan.

Raj Bhavan Circular Lawn-a hemi puala hun hman ah hian Governor chuan Assam Rifles buatsaiha sipai hna thawk thate chawimawina neih a ni leh he hun pawimawh tak hmanpui theia a awm chu lawmawm a tih thu sawiin, Assam Rifles-te chu India rama Paramilitary Force upa ber leh India hmarchhaka hmingtha tak, an hnathawh that avanga 'Tlang mite thian' tih hiala vuah an nih thu a sawi a. A bikin Mizorama ruihhlo tawlh man leh dan lova sumdawnna ven kawnga 23 Sector Assam Rifles-te hmalakna fakawm a tih thu a sawi a. Tunhnaiah ralthuam thahnem tak bakah helte thlenga man an ni leh khawtlang mipui rawngbawl sak kawnga Assam Rifles-te hmalakna chhuanawm a tih thu a sawi bawk.

Governor chuan chawimawina ngaihhlut hlawh tak dawngtu Assam Rifles sipaite, an chhungte leh thenrualte thinlung taka a lawmpui thu leh hetiang dawng thei tura an tawiawmna ropui a tih thu sawiin, Governor's Gold leh Silver Medal-te hi chawimawi phute chauh hlan thin an ni tih a sawi a, “Hetiang chawimawina hlan theia ka awm hi ka lawm takzet a ni,” tiin Chawimawina dawngtute chu rinawm taka thawk chhunzawm zel tur leh an hlawhtlinna chu ram rawngbawl kawnga phurna petu atana hmang turin a fuih nghal bawk.

He hun hi Inspector General Assam Rifles (East) buatsaiha neih niin Brigadier Girish Upadhya, SM, VSM, DIG, 23-Sector Assam Rifles leh mi pawimawh dang ten an telpui bawk a ni.