MCU Annual General Meeting vawi 27-na Aizawl-a neih Governor in a hmanpui

Mizoram Consumers' Union (MCU) Annual General Meeting vawi 27-na chu nimin khan neih niin Governor Dr. Hari Babu Kambhampati chuan khuallian niin a hmanpui a ni.

Synod Conference Centre, Aizawl-a MCU Annual General Meeting-ah hian Governor chuan kum 1995-a din MCU chu Consumer Protection Act, 2019 kengkawha theihtawp chhuaha consumer-te dikna leh chanvo humhim tura thawktu a ni tih sawiin, Consumer lungawilohna neite'n District leh State Commission-a an vuivainate an thlen kawngah MCU-in theihtawp a chhuahpui thin leh eirawngbawlna Gas Home delivery kalpui a nih theih nana an hmalakna te chu chhuanawm a tih thu a sawi a. District tina Consumer Organization din leh High School chin chunglam zirna In-a Consumer Club din tura hmalak a ni chu lawmawm a tih thu pawh sawiin, MCU chu Consumer-te dikna leh chanvo humhim kawngah an innghahna bulpui 6 te hre renga theihtawp chhuah turin a chah nghal bawk.

Governor chuan Sawrkar laipuiin Department of Consumer Affairs kaltlangin Consumer te hmakhua ngaia kawng hrang hranga hma a lak thu sawiin, e-commerce leh online platform hrang hranga thil lei thinte tana hmalak sak thei turin Consumer Protection Act, 1986 chu her danglamin dan thar, Consumer Protection Act, 2019 siam a nih thu a sawi a. Bureau of Indian Standards (BIS) Act, 2016; Legal Metrology Act, 2009 leh Consumer-te hrilhhriatna 'Jago Grahak Jago' Campaign chungchangte pawh tarlangin, Consumer-te tan lungawilohna thlenna tur National Consumer Helpline (NCH) toll-free number 1915 chu tawng 17 a siam a nih thu a sawi a. Changtlung zawk turin NCH 2.0 duan mek a nih thu leh Integrated Grievance Redressal Mechanism (INGRAM) portal hmanga complaint a thehluh theih thu a sawi a bawk.

Mizoram Consumers' Union (MCU) Annual General Meeting hi an pawl Vice President Thanglura chuan kaihruaiin Khualzahawm Supply Department Director Saizikpuii chuan tunhnaia technology thang chak takin e-commerce lamah hmasawnna thlen bawk mah se, hemi kentel inbumna awm thinte lakah Consumer-te dikna leh chanvo kan humhalh tlat a tul thu a sawi a. Consumer-te dikna leh chanvo humhalh sak leh zirtirna pek kawngah Nodal Department leh MCU-te tha thlah lova tanrual zel a pawimawh thu sawi bawk.

Nimin-a he hun hman ah hian MCU President Prof. Chawngsailova'n thu a sawi bakah General Secretary H. Lalbiakpuia'n report a pe a. Chawhnu lamah rorel inkhawm neih niin hruaitu thar an thlang nghal a. MCU hian tun dinhmunah Aizawl-ah Hqrs. a neih bakah District tinah Sub-Hqrs. a nei a. Branch 180 leh Club 60 a nei mek bawk a ni.