Neihloh khua ah Fehchhuah Programme hman a ni

Thenzawl Civil Sub-Division huamchhunga mipuite hnen thleng phaka Department hrang hrang ten hna an thawh theihna tur 'Fehchhuah Programme' chu nimin khan Neihloh khua ah hman a ni a, mipuite dawr theih turin Department leh Office hrang hrangte an inphochhuak a ni.
Neihloh Community Hall-a 'Fehchhuah Programme' ah hian Thenzawl SDO (Civil) K. Lalhlimpuia chuan Thenzawl Civil Sub-Division huamchhunga Department hrang hrang te tangkawpin 'Fehchhuah Programme' hi buatsaih a nih thu sawiin, Department hrang hrang ten anmahni remchan dan angin mipui tana tangkai tur leh sawrkarin mipuite tana thil a ruahmante bakah mipuite hnena sawrkarin service a pek theihte inhrihfiah tura pan chilh chu a tum ber a ni, a ti a. Fehchhuah programme hmasa ber hi Buangpui khua ah neih a lo ni tawh a. Tun tum hi a vawihnihna niin mipuiten hlawkthlak an tih thu an sawi a ni.

Neihloh khuaa 'Fehchhuah Programme' ah hian Mizoram Rural Bank Thenzawl Branch Manager Bobby Zothansangi chuan Financial Literacy Campaign neiin, Dr. George Martin Lalruattluanga, Veterinary Officer, Thenzawl chuan ran hri danna lak chungchang (Animal Vaccination) ah Awareness Campaign a nei bawk a. Police Training School, Thenzawl atangin New Criminal Laws chungchang inhrilhhriatna hun hman ni bawkin Neihloh VCP Lalawmpuia chuan lawmthu sawiin a hun khatna a khar a ni.

Hun hnihnaah CHC Thenzawl leh Integrated AYUSH Hospital, Thenzawl chuan mipuite tan a thlawna inentirna hun buatsaih in Apex Bank, Thenzawl Branch leh SDO (C), Thenzawl ten Help desk an buatsaih a, AH & Vety Department in Rabies Vaccination Helpdesk an buatsaih nghal bawk a. Heng sawrkar Department hrang hrang inphochhuak te hi mipui thahnem takin an pan a, an mamawh hrang hrangte thuneitute hnenah an thlen bawk a ni.