Mizo Inchai Palian-ah Lalsangliana a chak leh ta

Mizo Inchai Title Fight 2024 chu nizan hmasa khan neih niin Palian Champion lai Lalsangliana chuan Lalrinchhana Sailo hnehin a Title a humhim a ni.

Mahindra XUV3XO Mizo Inchai Title Fight 2024 hi tun thla ni 9 atang khan LPS Arena, Falkland-ah neih niin nizan hmasa khan a hmawr bawkna hun hman a ni a, mipui ngaihven hlawh ber Palian Title Fight-ah Champion lai Lalsang-liana (END, Upper Republic chuan amah chotu Lalrinchhana Sailo (North Vanlaiphai) chu hnehin a Title a humhim a ni. Palian-a Champion lai leh amah chotu hi Round 10 an inhmachhawn a, a palian zawk Lalsangliana hian 66-0 in hnehna a chang a ni. Lalsangliana hian kum 2014 atang khan Palian Champion a nihna a la humhim ta zel a, lawmman ah cheng nuai khat dawngin Lalrin-chhana Sailo hian Rs. 50000/- a dawng bawk.

Nulian Title Fight-ah Champion lai Lal-hmangaihsangi (Dilkhan, Salem Veng) leh amah chotu Zodinpuii (Lunglei) te chu inhmachhawnin Thawh 5-ah point 11 ve ve hmuin an inhnehtawk a, Thawh khat pek belh niin point hmuh belh an awm loh avangin Inbanphawi hmangin a chak zawk zawn a ni a, Champion lai Lalhmangaihsangi hi a chak ta zawk a, lawmman ah Rs. 50,000/- dawngin Zodinpuii hian Rs. 30,000/- a dawng bawk a ni.

Nizan hmasa a Mizo Inchai-ah hian Freestyle Wrestling-ah Inchai pali awmin Dominic Zarzo-sanga (Serchhip) chuan VLMS. Dawngliama (Khelo India Kolasib) chu a hneh a, R. Lalrinchhana (Serchhip) pawhin Robert Laltlansanga (Melriat) a hneh bawk. Lalchhanchhuaha (NRC RSC Aizawl) chuan JH. Zomuansanga (Khelo India Saitual) hnehin Jony Lallawmkima (Saitual) chuan Lalhruaitluanga (NRC Kolasib) chu a hneh bawk a. Heng Inchai hrang hranga hnehna changtu te hian lawmman ah Rs. 2500/- an dawng theuh bawk a ni.