CM Rubber Missions hawng

Chief Minister Lalduhoma chuan nimin khan Mizoram-a Rubber chin theihna hmun zawng zawnga Rubber chin vekna tur, ‘Chief Minister's Rubber Missions’ chu a hawng a, hemi puala Dawrpui Multipurpose Hall-a hun hman ah Mission bultanna tur RIDF XXX atanga cheng vbc. 27.98 sanction na lehkha chu Chief Minister hnenah hian Pankaja Borah, GM NABARD, Regional Office, Mizoram chuan a hlan a, he sum hmang hian District 7-a zau 24-ah bultan tur a ni anga. Chief Minister chuan thalaite chu hna-thawh a tui se, thapui thawhin rawn bei se an duh thu a sawi bawk.

Mizoram hian Rubber chin theihna ram Hectares 37,000 aia zau hret a nei a, Hectare 6700 velah chin tawh niin chin tawh zawng zawng hmun thuma thena hmun khat vel an hnai theih tawh a, kumtin Metric ton 1460 vel tharchhuah mek a ni. Tuna Mizorama Rubber ngah ber chu Er. CL Thangliana niin kung singli chuang nei mekin thla khatah cheng nuai 21 vel a la lut mek nia sawi a ni.