Mizoram State Project Monitoring Committee in Chief Minister hovin an hmalakna an thlirlet

Mizoram State Project Monitoring Committee (MSPMC) chu nimin khan Chief Minister Conference Hall-ah thukhawmin kumin September atanga November thla thlenga Project hrang hrang an enfiah te dinhmun an thlirho.

MSPMC General Body Meeting vawi 4-na hi Chief Minister Lalduhoma hova neih niin Chief Minister chuan Project Monitoring Committee te thawhrimna fakin lawmthu a hrilh a. Report kimchang tak siam zel tura chahin, “Project lo thawh mek tawh, siam that hleih theih tawh loh te chu thui tak kan siam tha thei lo a nih pawhin, kan huna hna thawh leh tur chin hi chu a tha tur a ni a. Tha taka endik kan tum ang. Ram hmasawnna tha leh tlo siam ngei kan tum tlat a ni,” tiin he huna tel te chu a chah a ni.

Tun tuma thutkhawm ah hian kumin September thla atanga November tawp thlenga Project an endik- Construction of Multipurpose Ground at High Field, Mc Donald Hill, Aizawl under Smart City; Construction of Eklavya Model Residential School, Tlangnuam; Establishment of Brood Bank, Thenzawl under PMMSY leh Widening & Improvement of road from Durtlang Leitan - Sihphir section of Aizawl - Durtlang - Lungdai - Kawnpui under CRIF te report ngaihthlak a ni a. Heng an thil endika thil fello an hmuh te a thlalak nena enin, hmalak zui zel dan tur pawh an sawiho nghal bawk a ni.

Heng bakah hian Lengpui Airport hna thawh mek an umzuina report te, Tlawng lei dawh mek an umzuina report te ngaithlain Tlawng lei nawr kai an tumnaa an khai chhinna hrui chah chhan chu Pulley vir thei lo (pulley jam) vanga a hrui inbat chat ta niin an sawi a. Fimkhur lehzuala hna an chhunzawm leh tur thu an lo sawi a, an hmanruate an lakhawm leh phawt anga, nakum January hapta hnihnaa an thawh chhunzawm theih an inbeisei a. Kawng erawh chu engtiklai pawha kaltlang theiha siam a ni.

He hunah hian Sawrkarin hmasawnna hna a thawhna tur hmun ram pass neih fel hmasak a tul thute, hna thawh zawh a nih hnua a enkawlna lam kalpui dan (SOP) neih a tulzia te an sawi a. Works Department ni lovin Civil Construction Works lian an khawihna hmuna harsatna awm chungchang te, Contractor hun pawh seisak (extension of time) chungchang te leh Project Monitoring Committee hmalakna a lo chak zawk theih nana rawtna dangte an sawi bawk.