Social Audit thlirletna nei

Mizoram khaw hrang hrang 301-a MGNR-EGS hnuaia Social Audit neih zawh tak thlirletna chu Social Audit Unit (SAU), Mizoram buatsaihin nimin khan Secretariat Conference Hall-II, MINECO-ah neih a ni.

He thlirletna hun hi SAU Director C. Laltleipuii chuan kaihruaiin District tin District Rural Development Officer (DRDO) leh Rural Development Block hrang hrang 18 atangin Block Development Officers-te, Assistant Rural Development Officer, Additional Programme Officer-te leh officials dangte an tel a. SAU Director chuan Social audit pawimawhna leh neih a tul chhan te leh Social Audit-in a tum ber chu he Scheme hnuaia hnathawh tur hrang hrang Sawrkarin a duan te chu a Scheme-in a tum ang taka dik leh felfai taka thawh a ni reng em tih leh engtiang takin nge mipuiin an chhawr tangkai tih a hmun ngeia endik a, thil felhlel awm ang ang te a tul anga siamthaa, bawhzui ngaite bawhzui zel a nih thu a sawi a ni.

He hunah hian November ni 25 atanga December ni 10, 2024 chhunga Mizoram hmun hrang hranga MGNREGS hnathawh endikna (social audit) neih zawh taka hmuhchhuah hrang hrangte sawihona neih a ni a. MGNREG Act, 2005 Section 17-na leh MGNREG Audit of Scheme rules, 2011 in a phut angin Ministry of Rural Development, Govt. of India hnuaia Centrally Sponsored Scheme zawng zawngah chuan Gram Sabha (Vantlang inkhawm) hmanga Social Audit hi neih vek tura tih a ni a. Hmasawnna hnathawh hrang hrang leh Social Security Schemes hrang hrangah SSU, Mizoram hian Sawrkarin a bituk ang zelin Social Audit hi a kalpui mek zel a. Mizoram pumah MGNREGS-ah hian Social Audit vawi 3,800 vel neih tawh niin kum 2012 atangin kumtin neih thin a ni a, kumin chhung hian a vawi khatna atan Mizoram-a khua awm zawng zawng (khaw 874)-ah Social Audit hi neih chhuah vek a ni.