Asia Cup-a Champion India Team-a Mizote chhuang

Sports Minister Lalnghinlova Hmar chuan Women's Junior Asia Cup (Hockey)-a Champion India Team-a tel Mizo pahnih te chu a chhuang takzet tih a sawi.

Women's Junior Asia Cup (Hockey) 2024 hi Pathianni zan khan Final khelin zawhfel a ni a, Final-ah hian India leh China inhmachhawn in hun pangngai ah 1-1 in an inhnehtawk a, Penalty Shootout hmanga chak zawk zawnna neiin India hian 3-2 in hnehna an chang a, India Team ah hian Mizo tleirawl pahnih - PC. Lalrinpuii (Hnah-thial) leh Lalthantluangi (Kanghmun South) te chu an tel a, heng mi pahnih te hi Thenzawl Hockey Training Center atanga inzir chhuak an ni.

Sports Minister Lalnghinglova Hmar chuan Mizo tleirawl pahnih PC. Lalrinpuii  leh Lalthantluangi te telna India Team te Women’s Junior Asia Cup, 2024-a an Champion chu a lawmpui thu sawiin, “A bikin kan Mizo nula te ka chhuang takzet a ni,” a ti a. “Hnahthial tleirawl Rinpuii leh Kanghmun ‘S’ tleirawl Tluangi te hi Thenzawl-a Women’s Hockey Academy atanga inzirchhuak ve ve an ni a. Academy leh Hockey Mizoram hruaitu, lo enkawl a kaihruai tawhtu zawng zawngte an fakawm a, hei aia sang zawk thleng zel turin duhsakna ka hlan a ni,” a ti Hockey Mizoram pawhin heng an player te hi an chhuang hle tih an sawi a ni.