Oil Palm tharchhuah kawngah hmalak tul ti

Mizoram Governor Dr. Hari Babu Kambhampati chuan Oil Palm tharchhuah kawnga theihna nasa tak nei Mizoram-ah theihtawp chhuaha hmalak a tul thu a sawi.

Governor hian nimin khan Raj Bhavan-ah Indian Council of Agricultural Research-Indian Institute of Oil Palm Research (ICAR-IIOPR), Pedavegi, West Godavari, Andra Pradesh atanga lokal Dr. K. Manorama, Principal Scientist, Dr. G. Ravichandran, Principal Scientist leh Dr. G. Somasundaran, Senior Scientist-te kawmin Mizoram in Oil Palm tam zawk a tharchhuah theih nana pawimawhte a sawipui bakah farmar-te'n harstana an tawh hrang hrangte leh a chinfel dan turte a sawipui a. He hunah hian Governor chuan Agriculture ram ni chungin India chu hriak ei chi (edible oil)-ah a intodelh loh thu leh a mamawh tam zawk ramdang atanga a lakluh thu sawiin, hemi harstana chingfel tur hian Sawrkarin theihtawp a chhuah mek tih a sawi a. Oil Palm tharchhuah kawnga theihna nasa tak nei Mizoram-ah theihtawp chhuaha hmalak a tul thu sawiin, hemi kawnga thiamna nei ICAR-IIOPR hotute chu Oil Palm chingtute harsatna leh mamawhte ngun zawka ngaihvenpui tur leh ICAR Research Complex for NEH Region, Mizoram Centre, Kolasib kaltlanga chak zawka hmalak a nih theih nana tan la turin a chah a. Mizoram chu India rama Oil Palm tharchhuah tamna ber ni thei tura tanlakpui turin a chah nghal bawk a ni.

He hunah hian ICAR- Indian Institute of Oil Palm Research hotute chuan Mizoram a hma an lak tawh dante Governor hi an hrilh a. Mizoram chu NE State zinga Oil Palm chin tamna ber a nih mek thu leh potential area 60,000-70,000 hectare a zau a neih thu an sawi a ni.