Vijay Diwas 2024 pualin Martar te zahna hlan

Nimin December 16, 2024 khan Vijay Diwas (Hnehna Ni) pualin Aizawl Treasury Square-a War Memorial-ah Governor Dr. Hari Babu Kambhampati hovin sipai huaisen, ram tana nun hlantute hriatrengna leh zahna lantir nan pangpar dah a ni.

Vijay Diwas pual hian Governor Dr. Hari Babu Kambhampati chuan hma hruaiin Sipai huaisen martarte zahna lantir nan War Memorial-ah pangpar dahin zahna chibai a buk a. Chief Minister Lalduhoma leh mi pawimawh dangte'n Governor hnung zui hian sipai huaisente hriatrengna leh zahna lantir nan pangpar an dah bawk a. Sawrkar, Civil leh Sipai lam hotute atangin Home Minister K. Sapdanga; Lt. Col. Clement Lalhmingthanga (Retd.), MLA & President, MESL; Padma Shree Hav. Lalbiakthanga, President, World War-II Veterans Association; Vanlalmawia, Home Secretary; Meenu Chaudhary, IGP (Intelligence); Brig. Girish Upadhyay, SM, VSM, DIG of 23 Sector Assam Rifles leh sawrkar mi pawimawh dangte pawhin Pangpar hi an dah a ni.

December ni 16, 1971 khan Ramna Race Course, tuna Suhrawardy Udyan ni ta, Dhaka khawpui, Bangladesh-ah India Sipai hotu Lt. Gen. Jasgit Singh Aurora kaihhruai Allied Forces (India sipai leh Mukti Bahini) hmaah Pakistan sipai lalber (Chief of the Pakistan Forces) Lt. Gen. Amir Abdullah Khan Niazi leh a sipai 93,000 te chu Indo-Pakistan War of 1971-ah India laka tlawmin an inpe a. He hnehna pawimawh tak avang hian East Pakistan, tuna Bangladesh tia thlak tak hian Pakistan atangin zalenna a hmuh phah a. He ni pawimawh tak hriatrengna atan hian kumtin Vijay Diwas hi India ram hmun tinah leh Bangladesh-ah te December ni 16 -h hman thin a ni.