Bana Kaih Scheme atan inremna ziakin Chief Minister's Bana Kaih Innovation Challenge hawn a ni

Bana Kaih Scheme hnuaia Progress Partners te loan pekna atan Mizoram Sawrkar leh Partner Banks te chuan nimin khan inremna (Memorandum of Agreement) an ziak a, he hunah hian Chief Minister Lalduhoma chuan ‘Chief Minister's Bana Kaih Innovation Challenge’ a hawng bawk.

CM Conference Hall-a he hun hman ah hian Chief Minister Lalduhoma chuan Bana Kaih Scheme chu a takin an kalpui dawn ta tih sawiin, “Bank te nena thawhdun ngai a nih angin kan thawhpui tur Bank te nena inremna kan ziak thei ta hi kan hlim hle. Mizoram tana ni chhinchhiah tlak, hmasawnna kawng dik min zawhtirtu hmalakna a nih ngei kan beisei a ni,” a ti a. He hunah hian Lalmalsawma Pachuau, Secretary to the Government of Mizoram, Planning & Programme Implementation Department Mizoram sawrkar aiawha hming ziakin State Bank of India (SBI) aiawhin Hubert S.Z Khobung, Regional Manager, Regional Business Office, Aizawl chuan hming a ziak a, Mizoram Rural Bank (MRB) aiawhin Sheryl L Vanchhong, Chairman, MRB chuan hming a ziah bakah Mizoram Co-operative Apex Bank Ltd. (MCAB) aiawhin A. Lallungmuana, Chief Executive Officer chuan a hming a ziak bawk a, hriatpuitu ten hming an ziak bawk a ni.

Inremna ziah zawh hnu hian Chief Minister Lalduhoma chuan ‘Chief Minister's Bana Kaih Innovation Challenge’ chu a hawng nghal a, he ruahmanna hnuaiah hian intihsiakna hrang hrang a awm dawn a, Department Innovation Challenge-ah Sawrkar Department hrang hrangten Project pakhat theuh theh chhuakin intihsiakna neih tur a ni a. District Innovation Challenge chu Mizoram District zawng zawngten DC kaihhruaina hnuaia neih tur niin NGOs, LC/VC, Self-Help Group (SHGs), Primary Agricultural Credit Societies (PACS) te leh Society anga in register zawng zawngte an tel thei dawn bawk a ni.

Higher Educational Institutes' Local Immersion Challenge-ah Mizoram sawkar hnuaia College-te, Central sawrkar hnuaia College-te leh Private College-te an tel thei dawn a. Khaw hrang hrangah zirlaite kalin an riak anga, an khaw kalnate'n harsatna an tawhte zirchiangin, chhawk zangkhai theih dan an ngaihtuahsak anga. Inventor's Challenge hnuaiah ngaihtuahna thar seng a, thil tha leh tangkai duangchhuak turte tan intihsiakna buatsaih a ni a. Thil thar leh tihdan thar (innovation) a ni tur a ni thung a, Mizoram tana danglamna thlen duhte tan tel theih vek niin heng intihsiakna ah hian a titha zual bikte thlangchhuakin lawmman siamsak an ni ang.

Nimin-a he hun hman hi Planning & Programme Implementation changtu Secretary Lalmalsawma chuan kaihruaiin Vanlaldina Fanai, Commissioner & Secretary chuan inlawmna thu a sawi bawk a ni.