Tlawng Hydel Project atan hmalakna kalpui mekin kum 2025 laihawl-ah DPR peihfel beisei a ni

Power & Electricity Department changtu Minister F. Rodingliana chuan Ministry of Water Resources, Govt. of India chuan Tlawng HEP Survey & Investigation (S&I) thawh nan leh (DPR) siam nan kum 2014 khan cheng Vbc. 11.55 a sanctioned thu leh kum 2025 laihawl velah chuan DPR peihfel beisei a nih thu a sawi.

P&E Minister hian nimin khan kawlphetha Megawatt 120 siamchhuah theihna tur, Tlawng Hydel Project khuahna tura ruahman North Lungleng bul-a Tlawng kam-ah thuthar thehdarhtute kawmin he thu hi a sawi a, CWC chuan Survey & Investigation hna hi February, 2015 khan thawk tanin tunah hian DPR siam pum turin hma a la mek zel tih a sawi a. Tuna Survey & Investigation neih tawh atanga a lan danin Tlawng Hydro Electric Project (HEP) hi Aizawl bul hnai, North Lungleng bula siam tura ruahman a ni a, he Project hian 120 MW a pechhuak thei dawn a. North Lungleng bul Tlawng lui-ah tuikhuah siam a ni anga, a san zawng hi 120 meters tur a ruahman niin Village Council ram engemaw zat tuikhua hian a chim dawn a. Amaherawh chu, khua leh In engmah a chim buai lo tur a ruahman a ni. Tuikhuah hian huan, lo, ram atan a la hman loh (uncultivable area) 2888 Ha. a zau leh thlai chin nana hman mek (Cultivable area) 187 Ha. vel a zau a chim pha tur a ngaih a ni. Tuikhuah hi Thenzawl piah Ramlaitui/Kawlhawk khua zawn vel thleng a huam dawn a ni.

CWC lam hian Topographical Survey te, Geotechnical investigation te, Seismic Study te, Construction material Survey te an ti zo tawh tih P&E Minister chuan sawiin, Tuikhuah/Dam siamna tur hmun a Foundation Study hi engemaw chen kalpui tawhin lei chhungril awm dan zirchianna ‘Drifting’ hna an la bawk a. He hna thawk tur hian Tender koh tawh niin, Tender Evaluation tih mek a ni a. He hna hi tluang tak a thawh a nih chuan thla 4 vel awh tur a ngaih a nih thu leh Drifting work hi zawh fel a nih veleh a ruangam awm dan tur leh senso ngai zat tur te chhut nghal a ni anga. Kum 2025 lai hawl velah chuan DPR hi peih fel beisei a nih thu a sawi a. DPR hi peihfel a nih veleh Mizoram sawrkar chuan he project tihlawhtling tur hian kut a thlak nghal dawn tih Minister chuan a sawi bawk.