Sawrkar hna thawk thei lo an awm a nih chuan a hun hmaa chawlh tir thlenga hmalak tum a ni

Home Minister K. Sapdanga chuan Mizoram Police chuan ram leh hnam hmelma ruihtheihthil hluar zel tur danna atan tha thlah lo a hma a lak zel thu sawiin, Police hna thawk thei lo an awm a nih chuan a hun hmaa chawlh tir thlenga hma an lak tur thu a sawi.

Home Minister K. Sapdanga hian nimin tlai khan Aizawl Armed Veng-a 1st Bn. MAP Ground-ah Mizoram Police Sports Meet vawi 22-na kharna hun chu khuallian nia hmanpuiin Mizoram Police chuan ram leh hnam hmelma ruihtheihthil hluar zel tur danna atan tha thlah lo a hma a lak zel thu a sawi a. Kumin ah November thla thlenga ruihhlo leh dan phallo thil hrang hrang man dan dinhmun a tarlangin, ram leh mipui him zawkna atana an thawh that chungah lawmthu a sawi bawk.

Home Minister chuan Police te tan fitness a pawimawhzia sawiin, tunhnaia Mizoram Police ten State chhung leh pawn, India ram pawn thlenga Sports discipline hrang hrangah hlawhtlinna an chang thei chu fakawm a tih thu sawiin, Taksa insawizawina lama intuaitharna leh Police ten taksa hrisel an neih theihna tur atan August ni 5, 2024 atang khan ‘45 Minutes For All Ranks of Mizoram Police’ an lo tan tawh chuan Mizoram Police te taksa fitness-ah leh discipline vawn kawngah pawh hma a tihsawn zel an beisei tih a sawi a ni.

DP&AR changtu Minister ni bawk K. Sapdanga chuan kumin August 28-a DP&AR in sawrkar hnathawkte hna thawh that leh that loh enna, Periodical Review neih dan tur inkaihhruaina Office Memorundum a lo chhuah tawh chungchang sawiin, “Kan Police te pawh he kan fitness programme-in a kaihthawh zawh loh khawp a hna thawk theilo kan awm chuan a hun hmaa chawlh tir, Premature Retirement, thleng pawhin hma kan la zel ang,” a ti a ni. Halpuah leh halmawi khapna khauh taka kenkawh a nih tur thu sawi bawkin, a bik takin sawrkar hnathawk te chu he thupek hi bawhchhe lo turin a chah a bawk a ni.

Mizoram Police Sports Meet vawi 22-na ah hian Mizoram Police te chu Ccontingent 12 ah inthen in infiammi sang chuang te chu Sports discipline 18-ah an inel a. PHQ (PHQ, Security, CID SB & Crime, Cyber Crime, Special Narcotics, Lok Ayukta, Sports Dept., MSSC & Secretariat) chu overall Champion a ni a, Central Range (Aizawl, Saitual DEF & Traffic) chu pahnihna niin Red Group (MPRO, F&ES, ACB, FSL & DM&R)Group chu pathumna a ni.

He Sports kharna hunah hian IGP (Intelligence) Meenu Choudhary pawhin he intihsiakna hlawhtling taka an nei chu lawmawm a tih thu a sawi bawk.