Serchhip District-a Drug License nei te kohkhawm an ni

Serchhip District chhunga damdawi zawrh phalna, Drug License neitute tan nimin khan damdawi zawrh chungchanga hriat tur pawimawh inhrilhhriatna neih a ni.
Serchhip Kawnpui VC Hall-a he hun hman hi Serchhip CMO Office-a Asst. Director (Food & Drug) Sarah Laldintluangi chuan kaihruaiin Serchhip-a Sr. CMO Dr. LP. Malsawma chuan he hun hi hmanpuiin thuhma a sawi a, damdawi zawrh chu Dan hnuaia kalpui a nih avangin Dan an zawm theihna turin hetiang hun hi buatsaih a pawimawh thu sawiin, he huna an thil ngaihthlak te chu tha taka zawm turin a chah bawk a ni.

He hunah hian Asst. Director (Food & Drug) Sarah Laldintluangi chuan The Drugs and Cosmetic Act, 1940 hnuaia damdawi zuartu ten an hriat tur pawimawh hrang hrangte sawiin, damdawi zuartute chu an zawrh theih chin hrechiang tur leh an damdawi lak-ah quality chhia te a awm theih avanga an fimkhur a tul thu a sawi a. Drug License neite tan Dan zawm a pawimawh thu sawiin, Dan zawm lo te tan hremna a awm zel avangin Dan zawm chu an tih ngei ngei tur a ni tih hre turin a chah a. Damdawi zawrh phalna te chu duh duha suspend leh cancel sak thei an ni lo tih pawh sawiin, an dawr te Drug Inspector in an enfiah ah dan an zawm lo a nih chuan State Licensing Authority-ah thlenin anni hian Dan zawm lo te chu insawifiah tura an tih hnuah an insawifiahna te ngaithlain chumi hnuah Drug License te suspend leh cancel sak thin an nih thu a sawi bawk a ni.

Tun dinhmunah Serchhip District-ah hian Drug License nei mi za hnih chuang an awm mek a, an zinga 31 te chu General License nei niin heng zinga mi 25 te chuan an Dawr-ah CCTV an dah tawh a. Wholesale License nei mi 5 awmin Homeopathy License nei mi pahnih leh Mobile License nei mi pakhat an awm a. A dang zawng te chu Restricted License a ni thung a. Kumin chhung hian Serchhip District-ah Drug License cancel mi pakhat a awm bawk a ni.