Mizoram SLDC chuan lawmman pakhatna dawng

Mizoram sawrkar Power & Electricity Department hnuaia Mizoram State Load Despatch Centre (SLDC) chuan Grid India leh Forum of Load Despatcher (FOLD) in rampum huap intihsiakna a buatsaih, 4th LDC Excellence Awards 2024-ah Emerging LDC Category-ah lawmman pakhatna a dawng.

He lawmman hlanna hun hi tun thla ni 14 khan 23rd National Power System Conference, IIT Indore-a neih ah buatsaih a ni a, P&E Department aiawhin Er. H. Zonunsanga, Engineer-in-Chief chuan Central Electricity Authority (CEA) Chairman Ghan Shyam Prasad hnen atangin a dawng a. Engineer-in-Chief hi SLDC Officer leh staff ten an tawiawm a. P&E Minister F. Rodingliana chuan he lawmman dawn a nih theihna tura rim taka thawktu zawng zawngte chungah lawmthu a sawi a, ram leh hnam tan theih-tawp chhuah chhunzawm zel turin duhsakna a hlan bawk a ni.

He intihsiaknaah hian India ram pumpui chu Category thum (3)-ah then niin, Emerging LDC Category (State leh UT 13 awmna) ah lawmman pakhatna 4th LDC Excellence Award 2024 hi Power & Electricity Department Mizoram SLDC hnenah hlan a ni a. Kum 2023 khan Power & Electricity Department Mizoram SLDC hi Top 3-ah an lo lang tawh bawk a ni.

Ramchhung State tin a LDC ten Power Source an neih an hman tangkai dan te, Power Market an hman tangkai dan te, State Capital tana Islanding Scheme an ruahman dan te, Grid Stability Maintain na tura Automatic Demand Management System (ADMS) leh Under Frequency Relays (UFR) an hman dan te, Cyber-Security atana invenhimna an neih te leh thawktute hmasawn zelna tur atana Training an bawhzui dan te hmanga he intihsiakna hi neih a ni. Heng bakah hian Interview leh Presentation hmanga intihsiakna neih ni bawkin heng tehna hrang hrang atang hian lawmman pakhatna hi an dawng a ni.