Mipuite himna turin Police ten hma la mek zel

Krismas leh Kumthar vuakvet lo thleng tur mipui ten him taka an hman theih nan Serchhip Police te chuan theihtawp chhuahin hma an la mek a, midangte tana buaina leh harsatna siamtu nilo tura inbuatsaih theuh turin an ngen bawk.

Serchhip Police te hian Krismas 2024 leh Kumthar 2025 vuakvet ah Serchhip mipuite an himtlan zawk nan leh thlamuangtaka he hun pawimawh hi an hman theih nan chhun leh zan duty insiamin ngawrh takin hma an la mek a, Zirtawpni kalta, Dec. 20, 2024 atangin Serchhip Bazar hmunpui ah harsatna tawkten an mammawh huna an pan theih turin Point duty leh Help Desk te an dah a, hei bakah hian Zan lamah pawh Mobile/ Foot Patrolling te neih reng thin a nih bakah Bazar-ah Traffic Police ten an vil reng bawk ai. Serchhip Police Station-ah pawh harsatna neite tan engtiklai pawha pan theih turin duty an awm reng bawk a. Lirthei chetsualna thleng palh thei laka mipuite an lo him zawk nan 'No Tolerance' pawh kalpui chhunzawm zel a ni bawk.

Serchhip District Police te chuan mipuite chu he hunpui hi hlim leh thlamuang taka an hman theih nan dan bawhchhe lo tura ngenin, dan lo anga thil ti an awm chuan an chungah dan anga hmalak a ni ang tih an sawi a. Serchhip District mipuite chu midangte tana buaina leh harsatna siamtu ni lo turin inbuatsaih theuh turin an ngen bawk a ni.