New Serchhip Golden Jubilee lawmna hun Chief Minister hovin hman a ni
Chief Minister Lalduhoma hian nimin chhun khan New Serchhip Roadside Market bul-a New Serchhip Golden Jubilee hriatrengna lungphun chu hawngin hemi hnu hian Govt. Serchhip College-a New Serchhip Golden Jubillee lawmna hun chu a hmanpui nghal a. New Serchhip mipuite a lawmpui thu leh khawtlang hruaitu lo ni tawh thin zawng zawngte chungah lawmthu sawiin, “Kum 50 chhungin New Serchhip chu Village Council pahnih leh Branch YMA pali ni khawp hialin a thang lian a. Zirna lamah College thuthmun a ni a, sawrkar hmun pawimawh tam tak an awm bawk a. Thang lian zel turin ram rem tak a nei. Heng hi malsawmna a ni. Vawiin-a khawtlang hruaitute hian kum 50 dang lo kal leh tur hmu phaka kan inbuatsaih a tul,” a ti bawk.
Chief Minister chuan New Serchhip mual te chu a remin an mawi tih sawiin, “Kan enkawl thiam chuan khawpui mawi takah kan chantir thei ang. Kan zir loh erawh chuan ram rem takah khaw nuam lo tak kan siam ve thei bawk,” tiin “Mizoram lailia awm in ni a, Chief Minister Bial in ni bawk a, kawng tinrengah entawn tlakin lo awm tlat ang che u,” a ti a. Kum tel-a leilung chhiatna a tam tial tial avangin heng chhiatna laka himna ngaihtuah chunga In leh lo kan din a ngaih thu leh khawchhung inkalpawhna kawng te pawh kan ruahman lawk a tul thu sawiin, “Mi fel pakhat avangin khawtlang kan inchhuang thei a, misual pahnih khat lek hian min tihmingchhe hle thei bawk. YMA leh NGO dang te lo tang ula, a tul ang zela kan Police te nena thawkho in, khauh takin hma lo la ang che u. Ruihhlo vanga harsatna te hi kan pumpelh vek seng lo a nih pawhin na takin kan nawr tawm tlat tur a ni,” a ti a. Khaw tam takin harsatna an tawh chu ‘thliarkar rilru’ a nih thu pawh Chief Minister chuan sawiin, “Veng bil ringawt te, thler khat ringawt te, Veng tepen pakhat ringawt te tana thapui thawha bei duh pawl hi kan lo awm leh mai thin. Hetianga ‘thliarkar rilru’ zim lutuk neih hi hmasawnna daltu a ni. Infrastructure pakhat hian khaw tam tak mamawh min pe thei,” a ti bawk.
Chief Minister chuan Serchhip bial tana hmasawnna hnathawh tur chhawpchhuah hrang hrang a tarlan zingah New Serchhip Kikawn atanga Serchhip Hmar Veng, Sports Complex panna kawng pawh tur kawng chu cheng nuai 1611.11 senna tur ruahman a ni tih sawiin, sawrkar laipuiin an approve veleh thawh tur a ni tih a sawi a, Zawlpui panna Link Road siamthatna turin cheng nuai 1000 ruahman a nih thu te, Paragliding hmun panna tur kawng siamna atan cheng nuai 358 dah a nih thu te, Mat lui-a Irrigation Phase II kalpui nan cheng nuai 371 ruahman a nih thu te, Hmawng-awn luiin Mat lui a finna, Sailam kai bulah khuah tum a nih thu leh hei hi endik a nih tawh thute a sawi a. Zawlpui atanga Zote kawng siam tum a nih dan te, Sailam panna kawng pawh NBCC lamin an buaipui dawn tih te a sawi a, Vantawngkhawhthla enna atanga Vantawngkhawhthla pawhtu tur Ropeway siamna atan cheng vbc. 32 ruahman a nih thu leh New Serchhip-a Helipad chu Heliport-a siam tum a nih thu sawiin, Khawtetlang-ah Circuit House dah tum a nih thute a sawi bawk.
New Serchhip Golden Jubilee lawmna hun hi Organising Committee Chairman C. Lalrotluanga chuan kaihruaiin Report ngaihthlak a nih bakah khawtlang tihmingthatute chawi-mawina hun hman a ni a. New Serchhip-ah hian kum 1974 khan Vanlalsiama te chuan In sain an khawsa tan a, tunah hian chhungkaw 980 vel awmin mi 4500 vel an cheng mek a ni.
Comments
Post a Comment