Dampui ‘S’ a cheng te insawnchhuahna tur hlan

Mamit District a awm Thorang Wildlife Sanctuary chhunga Dampui ‘S’ khua a cheng chhungkaw 6-te hnenah an insawnchhuahna tur sum ruahman thawh khatna chu nimin khan Forest Minister Lalthansanga chuan a Pisa-ah a hlan.

Thorang tlang hi Wildlife Protection Act 1972 Section 26A hnuaiah April 23, 2002 khan Wildlife Sanctuary-a pawm a lo nih tak avangin Dampui ‘S’ khua ah ‘National Rehabilitation and Resettlement Policy 2007’ hnuaia Option-I Reallocation Plan kalpui a ngai a. Wildlife Sanctuary tha leh changtlung, ramngaw leh nungchate tha zawka humhim hna kalpui a nih theih nan he khuaa chhungkaw chengte insawnchhuahna turin zangnadawmna cheng nuai 10 zel ruahman a ni a. Kum 2011 khan Dampui ‘S’ atanga insuanchhuahna tur, Reallocation Plan kalpui tura ruahmanna siam a nih khan chhungkua 61 awm anga chhinchhiahte atanga chhungkaw 44-te hnenah Reallocation Fund 1st Installment hi pekchhuah a ni a. Kum 2014 khan chhungkaw 47 chuan 2nd Installment leh Final Installment hi an dawng a, hemi kum tho hian chhungkaw 6-te chuan 1st leh 2nd Installment hi an dawn bakah kum 2015 khan chhungkaw 2 chuan dawng lehin Reallocation Fund chu chhungkaw 55 hnen ah semchhuah a ni tawh a.

Heng baka chhungkaw 6, hetih hunlai a insawnchhuak ve ta lo te chuan insawnchhuah rem an tih tak avangin Deputy Conservator of Forest (WL), Aizawl, Thorangtlang Wildlife Sanctuary In-charge ni bawk chuan a tul anga hma la chhunzawmin inremna tha tak a siam a ni ta a. Hemi ang hian chhungkaw 6-te hnenah hian 1st Installment cheng nuai 8 theuh chu nimin khan Forest Minister hian a hlan bakah 2nd Installment cheng nuai 2 pawh an insawnchhuah veleh a pek nghal theih tura ruahmanna siam lawk a ni tawh bawk a ni.