Serchhip DC Office in Krismas leh Kumthar luanchhuah Programme an hmang
Serchhip DC Pisapui Hall-a he hun hman hi Addl. DC Lalrinzuala chuan kaihruaiin Chief Minister Lalduhoma chuan luanchhuahna hun hlu tak an nei chu a lawmawm thu leh, buatsaih duhna thinlung an pu ringawt pawh rawngbawlna ropui a tling tawh nia a hriat thu a sawi a. Nun danin a zir loh vang te, duh vang reng ni lova hrisel loh leh vanduaina avanga rahbi tleu, hunpui lo thleng tur huphurh hluah hluah chhungkua tam tak an awm thin thu sawiin, chung mi te thleng phaka sawrkar leh tlawmngai pawlte kan kun hniam a tul thu a sawi a. Khawtlang hruaitu, Kohhran leh tlawmngai pawlte hnenah mi rethei tanpui tura chona siamin, “Kan Veng leh khuaah ngaihsakna dawng ngailo an awm a nih chuan Lal Isua zirtirna kan bawhchhia a ni,” tiin Sawrkar, Kohhran leh tlawmngai pawl hmalakna hrula Samari mi tha hna lo thawk reng thin te chu chawimawi tlak a tih thu a sawi bawk.
Chief Minister chuan kan hnam leh khawtlang chawimawitu inkhel thiamte lawmpuina pek an ni chu lawmawm a tih thu a sawi bawk a. An talent tipung zel tur leh tan la sauh sauh turin a chah a. He huna kalkhawmte chu Krismas leh kumthar chibai a buk a ni.
District Bawrhsap Paul L. Khuma chuan thilpek an sem chhan sawiin, “Isua Krista kan tana khawvela a lo kal ni - Krismas hian mi tin thinlungah hmangaihna te, thilphalna te a tuh thin,” tiin District Administration pawhin Krismas denchhena hetiang hun an buatsaih thei leh Chief Minister hialin a telpui avanga lawmawm a tih thu a sawi a. Krismas leh Kumthar hunpui lo thleng turah rilru thar pu theuh turin kalkhawm te a sawm a ni.
Krismas leh Kumthar luanchhuah Programme-ah hian Serchhip Town Area-a Village Council 14 atangin mi 5 theuh thlangin a vaiin mi 70 in DC Office atang hian Krismas thilpek hi an dawng a. Heng bakah hian Thenzawl atangin mi 30, Neihloh khaw mi 10 leh Buangpui khua mi 11 ten thilpek hi an dawn bakah Zoar Urban Deprived Children’s Home leh Unity Orphanage Home te hnenah sumfai hlan a ni bawk a. 47th Yonex Sunrise Junior National Badminton Championship 2024, Odisha-a neih zawh taka Girls Doubles Champion Lalrempuii; 47th Yonex Sunrise Junior National Badminton Championship Bronze Medalist, North East Zone Inter State Junior Boys Champion ni bawk Lalpekhlua Sailo & Malsawmhlua leh National Badminton Championship (Under-11) Mizoram Team a tel Lalruatkimi te chawimawina hlan an ni bawk.
Comments
Post a Comment