Lockdown hnuah Mizoram-a Chhiah lut a tlem; Kumin a Target erawh hmuh beisei a ni

COVID-19 vanga inkharkhip neih anih hnuin Mizoram Chhiah hmuh nasa takin a tlem a. Hetihlai hian Taxation Department chuan kumin-a sawrkarin Budget a tuk chu hmuh hram an beisei.
Mizoram sawrkar-a Taxation Department hian kumin March thla khan Chhiah hi Rs. 488,136,465/- a hmu a, heng te hi GST atangin Rs. 4,840,676,173/- te, Professional Tax-ah Rs. 171,496,736/-, Sales Tax-ah Rs. 1,171,854,475/-, Commodities & Services-ah Rs. 113,374/- leh Registration & License Fee-ah Rs. 595,280/- te a ni. India rama lockdown kalpui tak tak anih hnu April thla ah Rs. 143,516,224/- hmuh a ni a, May thla ah Rs. 460,875,729/- hmuh a niin June thla ah Rs. 374,613,578/- hmuh a ni leh a, kumin Financial Year thla 3 chhunga Taxation Department in Chhiah chi hrang hranga an sum hmuh belhkhawm chu Rs. 979,005,531.00 a ni. GST atanga sum hmuh hi thla tin a pung hret hret a, May thla bika Chhiah hmuh a pun chhan hi IOC (Indian Oil Corporation) in Tax an chhun vang nia thudawn a ni.
Taxation Department-a thawktute chuan ramdang (foreign) atanga Cigaratte leh eitur chi hrang hrang a lo luh loh avangin leh India thilsiam hralh tam anih avangin Chhiah hmuh hi a tlahniam lutuk lo niin an sawi a. Myanmar leh Bangladesh atanga bungrua a lo luh chuan dan anga chhiah lak a nih ve loh avangin Tax hmuh tur anga beisei hmuh phak a ni thin lo niin an sawi bawk.
Mizoram sawrkar chuan kumin 2020-2021 atan Taxation Department sum hmuh tur target a siam chu Rs. 6,000,000,000/- a ni a, target hi hmuh theih an beisei leh beisei loh chungchang zawhna chhangin Taxation Department thawktute chuan engemaw harsatna a thleng a nih loh chuan target chu an hmuh theih mai an beisei tih an sawi a. “GST bikah chuan ngai kan awh chho leh tan mek niin kan hria a. Dan pangngaia bungrua hi a lo luh reng theih a, harsatna dang a awm loh chuan kan target hi kan tlin leh mai theih kan beisei a ni,” an ti.
Taxation Department hian kum 2019-2020 chhunga sawrkar-in target tura an siam Rs. 5,21,79,06,000/- anih laiin Rs. 6,67,28,72,503/- an hmu a, an target hi Rs. 1,45,49,66,503 in an khum a ni. Goods & Services Tax bikah sawrkarin target a siam chu cheng vbc. 355 niin Rs. 5,31,98,06,155/- an hmu a, target an khumna hi Rs. 1,76,98,06,155/- a ni. Professional Tax-ah target cheng vbc.16.7 anih laiin Rs. 17,47,69,967/- hmuin Rs. 77,69,967/- in an khum a. Taxes & duties on Commodities and Serives-ah Rs. 1,13,374/- an hmu a, Registration & License Fee-ah Rs. 5,99,790/- hmuin target Rs. 2,93,790/- in an khum a ni. Hetihlai hian Tax on Sales, Trade etc. (VAT tia hriat thin) ah erawh an target an phak lo thung a, sawrkarin target Rs. 1,50,06,00,000/- a tuk ah Rs. 1,17,75,83,217/- hmuin Rs. 32,30,16,783 in an phak lo a. VAT a target an phak loh chhan hi sawrkarin zu zawrh a tih tawp vanga sum hmuh a tlem tak vang nia ngaih a ni.

Comments

Chhiar Hlawhte