Mizoram-a Vangchhia velah Civilization bo a awm ngei nia an hriat thu ASI in an sawi

INTACH Mizoram Chapter leh Archaeological Survey of India (ASI), Aizawl Circle te \angkawp chuan nimin khan Aizawl Press Club-ah thuthar thehdarhtute kawmin tunhnaia Pipute Sulhnu laihchhuak chungchang chu a lem nen an sawifiah a. Vangchhia velah hian Civilization bo a awm ngei nia an hriat thu an sawi.

Nimin a thuthar thehdarhtute an kawmna hun hi P. Rohmingthanga, Convener, INTACH Mizoram Chapter chuan kaihruaiin INTACH Mizoram Chapter hmalakna hrang hrangte a sawi a, Dr. Sujeet Nayan, Dy.Superintending Archaeologist, Aizawl Circle a Head Office Incharge ni mek leh Director of Excavation chuan Powerpoint Presentation hmangin an thil hmuhchhuah te a pholan bakah a sawifiah nghal a. ASI in Vangchhia a Pipu Sulhnu thil a laichhuah tarlan te chu - Mitthi phumna (Burials), Lungrem (retaining wall), Lung Kailawn (Stairs), kawthler leh khawchhung kawng (Street or Pathway), Lung tian (Bund), Lungpher kerkuak (Water Pavillion), Ralvenna bang (Defence Wall), Lung kermawi/Lungphun-a milem ker (Menhir), Lungpui/Lungtum sakhat a inthawina leh sakhuana lam kaihhnawih milem ker (Petroglyphs), Hlumbel, Ruhro, Thir bel (Iron Casket) leh Thir hriamhrei chi hrang hrang (Weapons) bakah Kuaite (Pipe), kawrkilh niawm tak tak te leh thil tenau dang te a ni.

Dr. Sujeet Nayan chuan Vangchhia hmuna ASI in a hmuhchhuah chu Mizo Culture leh Mizo te History \obul chhuina atan thlenga thil pawimawh a nih theihna te sawiin, “Indus Valley Civilization pawh tuna Pakistan ramchhung, Harappa hmunah hmuh a nih avangin Harappan Culture tih a ni a. Chutiang deuh bawk chuan Vangchhia-ah hian Mizo thlahte ni ngeia ASI in a rin te hnuhma liantham chu hmuh hmasak leh zirchian a ni a. Vangchhia-a Pipute sulhnu ang hi Khawbung RD Block chhung hmun tam takah hmuh chhoh mek a nih leh zel avangin heng lai hmuna Pipute sulhnu zirchianna hi 'Vangchhia Culture' tih mai theih a ni,” a ti a. Vangchhia-a ASI in a laihchhuah a\anga thil chiang chu heng lai hmunah hian Civilization bo (The lost Civilization) a awm ngeiin a lang tih pawh sawiin, “Civilization a nih chhan chu heng lai hmunah hian changkang tak chu ni lo mahse, mipui vantlang khawsaho leh sawrkar tenau in a mamawh ang thil engkim a awmkim vek a, awmze nei takin a inremkhawm vek bawk a ni,” a ti. Thil hmuhchhuah zingah lungpher a kerkuak, tui khuah tlinna nia ASI in a ngaih (water Pavillion) chu Mihring awmna (settlement) an hai apiangah a awm deuh ziah a. ASI chuan mimal tui dahkhawlna ni ah ngai mahse thilmak tak leh la chhuichhuah loh a la ni tho a ni, an ti bawk.

ASI chuan Khawbung RD Block chhunga khaw 28 zinga khaw 25 chu Pipute sulhnu awmna hmunah a ngai a. Heng zinga khaw 15 chu zirchian a ni tawh a ni.