Thursday, 30 August 2018

Khawlailung khuaah Farmers’ Training neiin CM Special NLUP Assistance semchhuah a ni

Sericulture Department bultumin nimin khan Khawlailung Dinthar YMA Hall-ah Farmers’ Training neih a ni a, he hun hi bialtu MLA leh Sericulture Minister, Vanlalawmpuii Chawngthu chuan khuallian nia hmanpuiin CM Special NLUP Assistance chu chhungkaw 18 hnenah a sem nghal bawk.

He training hawnna inkhawm District Sericulture Officer, V. Zothansanga kaihhruaia neih ah hian Sericulture Minister chuan a bial chhunga Khawlailung chu SAGY Village hmasa ber atana thlan a nih bakah sawrkar a\anga duhsakna tam tak a dawng zui chu lawmawm a tih thu a sawi a. “Duhsakna kan dawn chhan hriaa, kan lawmthu sawina tur chu a taka thawhchhuah hi a ni tih kan hriat a pawimawh hle a ni,” tiin loneitu kalkhawmte a ngen a. Silk phei chu a hralhna turah buaina a awm loh thu leh a rate a tlakhniam ngai loh thu sawiin, “Daihlim hnuaia hnathawh a ni deuh ber bawk a, Mizoram hi a \hat duhna ram a ni an ti lehzel bawk si a, kan tan he eizawnna hi a \hain a phurawm a ni,” tiin kalkhawm te a fuih a ni.
Minister chuan Mizoram sawrkarin mipuite hnenah \anpuina kawng hrang hranga pe in a tih turte a hlen \hin tih sawiin, a dawngtute lamin \anpuina an dawn chhan ang ngeia an lo hmana, an lo hlawhtlinpui \heuh chuan he ram hi a lo dingchhuakin hmasawnna nasa zawk kan lo hmu dawn tihna a ni, a ti a, kan ramin hma a sawn zel theih nan kan zavai hian mahni zawn \heuhah mawhphurhna kan nei tih sawiin, he training an buatsaih hlutzia hriaa taima taka training \heuh turin pangang vulhtu kalkhawm te hi a chah bawk.
Khuallian hian Khawlailung-a Pangang vulhtu \ha mi pathum (3) thlanchhuah hnenah Central Silk Board lamin an rawn tum sak lawmman hlanin lawmman pakhatna chu Roliana’n dawngin, pahnihna Lalremtluangi leh pathumna Lianmama ten an dawng a. Integrated Sericulture Development Programme a\anga lei Solar Lamp chu pangang vulhtu chhungkaw pathum (3) hnenah a hlan bawk.
He hunah hian CM Special NLUP Assistance semna pawh neih nghal niin CM Special NLUP Assistance hi tlem lai deuhva tihfel tawh, engemaw avanga la sem chhuah rih loh a ni a, he \anpuina dawngtute hi N. Vanlaiphai SDO (Civil) huamchhunga khaw hrang hrang zingah Khawlailung pan remchang zawk chhung-kaw 18 te niin heng mite hi Rs. 20,000 \heuh hlan an ni a. He \anpuina vek hi nimin tlai khan E. Lungdar BNRGSK Hall-ah E. Lungdar pan remchang zawk chhungkaw 22 te hnenah Minister, Vanlalawmpuii Chawngthu hian hlanna a nei leh bawk a ni.
Nimin a training buatsaih hi North East Region Textile Promotion Scheme (NERTPS) hnuaia buatsaih niin, he scheme Project Co-ordinator leh Deputy Director, Lalremsiama chuan a scheme kalphung leh a thil tum te, Pangang vulhtute tana thil pawimawh te sawifiahna a nei a. India ramin a mamawh khawp Silk a thar-chhuah tak loh avangin Silk tharchhuahna kawnga hmasawnna nasa tak a awm theih nan Central sawrkar chuan State Matching Share pawh awm meuh lovin hmalakna tur sum min rawn pe a. Serchhip District a hmalakna ah Khawlailung khua chu duhsakin chhungkaw tam tak thlan an ni a, duhsak tlak, hlawhtling ngei tura beitu nih \heuh kan tum a \ul a ni, a ti a. Dr. Lalthla-muana Pachuau, Scientist C, Research Extension Centre, Aizawl, Central Silk Board chuan an training dan tur kalphung sawifiahna a nei bawk.
He mi hnu hian loneitu kalkhawm te chu Dr. Lalthlamuana Pachuau, Scientist C; R. Laldinsanga, PGDS; Israel Lalrokima, PGDS; Lalramchuana, Project Assistant leh Zonun-sangi Zote, Project Assistant ten Pangang vulh dan leh Pangang chaw hmun enkawl dan chi hrang hrangte kimchang takin an zirtir a ni.

Latest News

NACO hotu ten Mizoram rawn tlawh mek

Chawlhkar khat chhunga Mizoram District pathum – Aizawl, Lunglei leh Kolasib District-te tlawh kual tura rawn zin National AIDS Control Or...