Serchhip-ah Fisheries Minister hovin Ram Zalenna Ni vawi 72-na hman a ni

India Independence Day vawi 72-na chu nimin khan ramchhung hmun hrang hrangah uar taka hman a ni a. Serchhip-ah pawh DC’s Playground Khawtetlang-ah Independence Day hi hman niin Fisheries Minister, Vanlalawmpuii Chawngthu chu khuallian niin Hnam Puanzar pawtparhin mipuite hnenah thuchah a sawi bawk.

Nimin a Serchhip-a India Independence Day lawmna ah hian Fisheries Minister, Vanlalawmpuii Chawngthu chuan India Hnam puanzar pawtparhin Hnam puanzar chibai buktu Parade Contingent te chibai bukna a chhanglet a. Hemi hnu hian mipuite hnenah thuchah sawiin zalenna zarah India ram chu kum reilote chhungin khawvela ram thiltithei berte zing ami ah a inhlangkai tih sawiin, Mizoram pawhin zalenna zar zovin chak takin hma a sawn chho zel a, kan State hi India ram state zinga mipui sum lakluh pun chakna ber pawl, Growth Driver State an tih zinga mi kan ni ta hial tih a sawi a. Serchhip District pawh nasa takin a \hang tih sawiin, tunhnai maia Infrastructure lama hma kan sawnna te, mirethei chawikanna te, hriselna leh zirna lama kan \han chhohna te tarlangin, mipuite himna leh hlimna turin sawrkar chuan dan leh thupek kenkawh a ngai pawimawh hle tih a sawi a. State ralmuang ber te zing ami kan nih reng theih nan hmalak reng a nih thu sawiin, Serchhip District chhungah pawh kumin chhungin Police ten thubuai 204 ziaklutin heng zinga 186-ah chargesheet thehluh a nih tawh thu a sawi a. Police te intuaitharna hun buatsaih \hin a nih bakah zan lamah pawh lirthei hmang leh hmanglo pawhin Patrolling neih a nih \hin thu leh ruihhlo dona kawngah pawh Sub-Hqrs. YMA nen \angruala hmalak a nih thu a sawi.

Fisheries Minister chuan Serchhip Police Station building thar chu sak chhunzawm leh mek a nih thu te, DIET Building thar pawh hawn mai theih tura peih a nih tawh thu te, Sports Complex changtlung tak siam mek pawh zawh mai hmabak a nih thu te, Nursing School leh Panchayati Resource Centre te sak a nih thu te sawiin, zirna kawnga hmalakna hrang hrangte a tarlang a. DIET Serchhip-ah thla hmasa khan Diploma in Elementary Education Exam-ah mi 32 ten \ha taka an pass thu a sawi a. Serchhip College building RUSA sum hmanga sak pawh reilote ah zawh beisei a nih thu sawiin, Serchhip District Hospital-ah NEDP a\angin hmanraw thar \hahnem tak dah thar a nih thu a sawi a. Kum kalmek ah OPD-ah damlo 28,163, Emergency Case-ah 6514 leh damlo admit 3672 an awm thu sawiin, naupiang 384 kan neih thu a sawi bawk.

Heng bakah hian Social Welfare Department in National Social Assistance Programme (NSAP) hnuaia \anpuina an pek hrang hrangte pawh tarlangin, Faina kawnga hmalakna te pawh a tarlang a. NEDP hnuaiah DLAO kaltlangin hna chi hrang hrang 230, cheng nuai 605 man thawh mek a nih thu pawh sawiin, UD&PA Department in NULM hnuaia hma an lakna hrang hrang te a tarlang a. Heng te bakah hian miharsa zawkte chawikanna programme engemaw zat kalpui mek a nih thu leh, Mizoram sawrkar flagship programme, NLUP leh NEDP hmanga hmalakna tam tak kalpui mek te tarlangin, Serchhip a sawrkar hmasawnna hna-thawh langsar zualte a tarlang bawk.

Tunhnaia Mizoram sawrkar hmalakna \henkhat pawh tarlangin Minister chuan State pawn pan kher ngai lovin kan ramchhungah Doctor zir theih a nih tak thu te, Youth Commission kaltlangin \halai tam takin hna leh lawm-man an an dawn thu te, infiamna ah ah pawh khawvel huapa lawmman dawng an awm thu te sawiin, heng hlawhtlinna te hi kan zavaia thawhrah, mipui sawrkar, mipui ta a nih thu a sawi a. Heng hmasawnna zawng zawng te hi zalenna leh sawrkar kalphung \ha tak vanga kan neih a nih avangin zalenna chawinung zel tura kan inhlan a pawimawh tak zet a ni, tiin kalkhawmte chu thawhpuitu \ha nih tum turin a chah bawk.