Friday, 31 August 2018

Mizoram-a Post Office zawng zawngah India Post Payments Bank (IPPB) hawng dawn

India ramah Post Office Saving Bank (POSB) hlawhtling taka kalpui a nih hnuah kumin hian Mizorama Post Office zawng zawngah India Post Payments Bank (IPPB) hawn a ni dawn.
He thu hi nimin khan Aizawl Press Club-ah Post Master General, T. Mang Min Thang-a’n chanchin thar theh darhtute hrilhin, kum 2015 khan RBI-in Department of Post chu Payment Bank siam phalna a pe tih a sawi a. IPPB hi sawrkar laipui ta a ni a, tunah hian Ranchi (Jarkhand) leh Raipur (Chhattisgarh) ah hawn a ni tawh a, kumin chhung hian Mizorama Post Office 383 leh India rama Post Office 155,000-ah te IPPB chu hawn vek tum a ni a. Heng Post Office zinga 130,000 chu thingtlang a awm a ni, a ti.
IPPB-ah hian Saving Account leh sumdawng te hman tur Current Account a hawn theih dawn a, Account-ah hian Cheng nuai khat (1) thleng dah theih a ni a, Account hawng duh te, pawisa la chhuak duh leh Aadhar Card hmanga pawisa thawn duh te chu Post Office-a thawkte’n anmahni In-ah an pan zel thei dawn tih T. Mang Min Thang-a hian a sawi bawk a, Minimum Balance a awm lo ang, a ti bawk a. IPPB Account hmang hian bill hrang hrang - Mobile Bill, Recharge, Electric Bill, Online Shopping Payment leh Bank danga pawisa thawn a tih theih dawn a. Heng bakah hian IPPB account-ah hian Direct Benefit Transfer chi hrang hrang NREGS, Gas Subsidy, Scholarship, Pension leh thildang te a dawn theih dawn bawk a ni.
India Post Payment Bank (IPPB) hi thla thar, September ni 1, 2018 tlai dar 3:15-ah Prime Minister, Narendra Modi chuan Delhi a\angin a rawn hawng dawn a, hemi rual hian Mizoram-a hmun 30-ah IPPB hi hawn ve nghal a ni ang a. Aizawl-ah chuan Mizoram Governor, Kummanam Rajasekharan-a’n Lal Thanhawla Auditorium-ah chawhnu dar 2:45-ah a hawng ang a, hemi rual hian District tina Deputy Commissioner ten an District \heuhah an hawng dawn bawk a ni.
India Post Payment Bank (IPPB) hi  Serchhip-ah pawh a hawnna hun hman a ni dawn a, tunah hian India Post Payment Bank (IPPB) buaipui tur hian thawktu pakhat chu rawn awm tawhin tunah hian Serchhip Venglai-a Post Office-ah inbunin he ruahmanna ti hlawhtling tur hian chak takin hma an la mek a ni.

Latest News

NACO hotu ten Mizoram rawn tlawh mek

Chawlhkar khat chhunga Mizoram District pathum – Aizawl, Lunglei leh Kolasib District-te tlawh kual tura rawn zin National AIDS Control Or...