PRISM in VC thuneihna sang zawk pe dawn

PRISM Party President, Vanlalruata chuan PRISM Party an sawrkar a nih chuan Village Council te thuneihna sang zawk pek an nih dawn thu sawiin, Village Development Committee din a nih dawn thu a sawi.

PRISM Party hian nimin khan Chhimphei tlangdung, Aizawl South III huamchhungah Campaign Rally nei lehin he hunah hian PRISM President, Vanlalruata chuan PRISM Party in thingtlang khaw inawpna siam\hat an tum dan a sawi a. PRISM President chuan thingtlang khaw inawpna kalphung tur PRISM Party in a duan dan chuan khaw pakhatah VC pakhat chauh a awm dawn tih sawiin, "Village Council hi thuneihna sang zawk pein sawrkar pa-te ah kan siam dawn a. Municipal-a Councilor ten bial bik an nei ang hian VC member ten bial bik an nei ang a. Department 20 hmalakna ah thuneihna leh mawhphurhna pein heng hi Minister ten portfolio an insem ang hian an insem \hin ang," a ti a. VC in mipui huap leh khawtlang tana \ha zawka hma an lak theihnan Dan siam thlapin Village Development Committee din a ni anga. He Committee hi VC kaihhruai a ni ang a. VC member ni lo member-ah an tel bawk ang tih a sawi.

PRISM President chuan, "Khaw tinin an khaw rama thil hlu awm leh thlai chin theih chi an zir ang a, chuta \anga \ha tur chu a \ul anga sawngbawlna tur industry din zel a ni ang a. Thlai chin lama \an kan lak \hin hi a sawngbawlna tur industry a awm loh chuan kan hausak pui thei lo tih kan ram hian kan hmu chiang tawh a. Keini chuan ram changkang ten hma an sawnpui a, an hausakpui \hin kalphung zui vein industry din lamah \an kan la ang a, hmun leh hmunah an thlai thar hralhin thingtlang loneitu te an lo hausa thei tawh dawn a ni,” a ti a. Kan hmaa inthlan lo awm turah hian kalphung pangngaia kala kum 5 dang hrehawm ti taka phun leh kan ham\hat vena tur duh kan thlang thei tih pawh sawiin, fim taka ngaihtuahna hmanga vote thlak turin mipuite a sawm a, "Kan kal dan pangngai hi a \ha e, titu tan chuan kan thlantlin a, thuneihna kan lo pek tawh, an kal dan phung kan hriat chian sa MNF emaw Congress emaw vote leh tur a ni mai a. Kal dan ngai ning a, kalphung danglam duh tan chuan keini PRISM Party hi min vote mai rawh u," a ti bawk.