Latest News

Union MoS in ITI Veng-ah UPH&WC a hawng

Mizoram tlawha rawn zin Union Minister of State, Health & Family Welfare, Anupriya Patel-i chuan nimin khan Aizawl ITI Veng a Urban Primary Health Centre (UPHC) chu Healthcare Service chi hrang hrang 12 awm tharna tur, Urban Primary Health & Wellness Centre (UPH&WC) atan a hawng.
UPH&WC hawngtu Union MoS for Health & Family Welfare, Anupriya Patel chuan Mizoram Health Minister hmalakna hnuaiah State in Healthcare-ah hma a sawn nasat thu a sawi a. Sawrkar laipui chu Mizorama Healthcare huang chhunga hmalakna te thuam chak turin a inhuam a, \anlakna tur tlem a zawng awm mek pawh hi Mizoram in a chinfel thuai a rinawm a ni, a ti.
Anupriya Patel chuan National Health Mission hnuaia hmalakna huang pahnih- Primary leh Secondary Healthcare kaltlangin Reproductive & Child Health Services (RCH) leh Communicable Diseases a hmalakna te chuan hlawhtlinna a thlen nasa tih sawiin, thil lawmawm a nih thu a sawi a. Amaherawh chu tunah heng hmalakna pahnih in a huam telloh huangah harsatna a awm mek tih sawiin, “Cancer vei an pung a, Zunthlum vei an pung a, Lung natna leh Thisen sanga avanga harsatna tawk te bakah damlo inenkawlna senso lo pung nasa lutuk avang te hian Preventive leh curative services chauh nilo promotive leh rehabilitative services huam tel te hi kan mamawh tawh a. Chuvangin sawrkar chuan Primary Healthcare liantham leh huapzo zawk a ngaihtuah chhuak ta a ni,” a ti a. Chu chu Ayushman Bharat Programme niin ban pahnih neiin pakhat zawk chu National Health Protection Mission a ni a, hemi hmang hian insurance kum khatah chungkaw pakhat tan cheng nuai 5 zel, Socio- Economic Census behchhanin chhungkaw vbc. 10.74 zet thlanchhuah tawhte tan ruahman tawh a ni, a ti.
Union Minister chuan Ayushman Bharat Programme ban pakhat zawk chu ramchhunga Health Sub-Centre, Primary Health Centre, Urban Primary Health Centre 150,000 zet te Health & Wellness Centre-ah siam niin ITI-a UPH&WC pawh hi chutiang hmalakna hnuai a mi chu a nih thu leh Mizoram-ah chuan Sub-Centre leh Primary Health Centre 32 nei mekin heng Sub-Centre 20, Urban PHC 8 leh Rural PHC 4 te pawh hi Health & Wellness Centre-ah siam a ni vek dawn a ni, a ti a. Heng hmunah te hian hnathawh tur tam zawk siam a nih dawn thu a sawi bawk. He hunah hian Health Minister, Lal Thanzara pawhin Healthcare huangchhunga mellung pawimawh tak, Mizoram Institute of Medical Education and Research Society (MIMERS) a lo pian theih nana Central Sawrkarin thlawpna chu Mizoram tan thil lawm tak a ni, tiin Healthcare-a hmalakna ah sawrkar chu a phur thu a sawi bawk.

Comments

Popular News (Last 30 Days)