MNF hi kum 15 an opposition dawn - John-a

Mamit bialtu MLA, John Rotluangliana chuan, "MNF hian kum 15 an opposition dawn tih hre rawh se," a ti.

Nimin a Mamit Chhim Veng YMA Hall-a Mamit Central Block Congress Committee huaihawta Block Conference neih a hman-puina ah he thu hi sawiin John Rotluangliana chuan, tun hmain Congress kum 10 a sawrkar tawh thu leh an sawrkar kum tawp 1998-ah khan an tlak tur a chian hle thu sawiin, "Khami \um khan kan tla dawn tih kan chiang a, tunah chuan a dan a dang daih ta mai a ni. Kum 10 kan sawrkar hnuah kan lamah tam tak an lo la lut a, a sawrkar lo MNF lamah mi an beidawng tlat a ni. Pathian khawngaihna leh mipuite zarah kan sawrkar leh dawn," a ti a ni.

NLUP chungchang sawiin John Rotluang-liana chuan, "High Court hian min stay loh avangin NLUP hi inthlan hmain kan sem dawn a ni. NLUP hi Congress hian kan atchilh lo a, kan finchilh tawp mai a ni. Hei aia policy \ha hi Zoram politics-ah a awm lo a ni. MNF hian a \ha lam an tuipui ngai lo a, NLUP te kan sem zel an dal duh a ni," a ti a. NLUP chu MNF chuan 'Congress Thal alh thei a ni' an tih thu sawiin, mipui \anpuina tur chu sem loh dan tur zawng tlat ah a puh bawk.

Mizoram Institute of Medical Education and Research (MIMER) chungchangah MNF ten an kuhmum-a par anga an sawi chu chhang letin, "An kuhmum lo hrim hrim, kum 1998 kan sawrkar lai khan Referral Hospital atan cheng vbc. 40 kan dawng daih tawh a, a hmun pawh kan thlang, mahse kan hmang hman lo a, MNF in an hmang a, an tichhe vek a, Ar vulh nan an chhuah a, an kalsan a nih kha. Keini' n bul kan \an leh a, Doctor zirna hial kan din ta a ni," a ti a. ZPM chu an thawhhona pawh a mumal tawhlo nia sawiin, "Super CM te an ti, vawikhatmah la CM lo kha. Super CM chu Pu Lal Thanhawla hi a ni tih ka puang e," a ti bawk.