Minority Scholarship chungchanga hriattur te

Minority Scholarship chungchanga hriattur te

- Laldinpuia

Tunlai hian zirlaite tan Central server lama Minority Scholarship dilna hun hawn leh mek a ni a, dilna hi Sept 30, 2018 zan dar 12:00 thleng hawn a ni ang. Hemi chungchangah hian a dil dan leh a kalphung hrang hrangah te thu lengvak a tam hle mai a, chuvang chuan mipui ten a kalphung kan hriat theih nan leh awlsam taka dil dan kan hriat theih nan a kalphung leh dil dan tlangpui sawrkar in a kaihhruaina a siam zulzuiin mipui tena kan hriatthiam theih tur leh a dil awlsam dan han tarlang dawn teh ang. Scholarship dil theih hi chi hrang hrang a awm a, Scholarship dil duh zat a zirin a kalphung pawh a danglam hret hret a, chuvang chuan tun \umah chuan Ministry of Minority Affairs hnuaia Pre leh Post-Matric Scholarship chungchang bik chauh hi kan thlurbing rih ang.

Minority Scholarship chu eng nge? :

= Kum 2006 a\ang khan sawrkar laipui chuan India rama hnam hnuaihnung zawk ten Scholarship rualkhai taka an hmuh ve theih nan Minority Scholarship hi a lo duangchhuak \an a. Kumtin cheng Nuai 30 lai ‘Fresh’ Scholarship atan hian ruahman a ni a, India rama State leh UT tena Scholarship an hmuh dan hi hnam hnuaihnung an tam dan a\anga chhut a ni. Mihring tam dan chhut nan hian kum 2011 chhiarpui chu behchhan atan hman a ni.

Tute nge dil thei? :

= Minority Students, Muslim, Christian, Sikh, Buddhist, Jain, Parsi India ram chhunga lehkha zir te tan dil theih a ni.

Khawia dil tur nge? :

= Scholarship te hi Direct Benefit Transfer veka pek an nih tawh avangin a dilt uten anmahni in an indil chawp a ngai tawh a. A dil tur chuan internet kaltlangin Scholarship website www.scholarships.gov.in a\angin emaw Ministry of Minority affairs website www.minorityaffairs.gov.in a\angin dil theih a ni. Zirlai ten mahniin an dil thei a, midangin an dilsak thei bawk.

Tute nge dil thei? :

= Sawrkar leh private Institution a zirlai ten an dil thei a. Pre Matric scholarship dil tur tan Family Annual Income ah Rs. 1,00,000 (Nuai khat) a pel lo tur a ni a, Post Matric Scholarship dil tan Family Annual Income in Rs. 2,00,000 (Nuai hnih) a pel tur a ni lo. Heng aia tam Income nei te tan a dil theih loh. Tin, a dil turte hi kum hmasa ah Final exam -ah 50% aia tam mark an hmu ngei tur a ni. Zirlaite hian kum khat ah Scholarship hmun khatah chauh an dil thei ang. Tin, chhungkaw pakhatah mi 2 aia tam Scholarship pek theih a nilo.

Dil turin eng document nge ngai? :

= Scholarship dil tur hian document engmah online a upload ngai a awm lova, Bank Account leh Aadhaar number neih chuan School fee lak zat leh admission tih ni te hriat chuan mahni pawhin dil mai theih a ni. Scholarship a Rs. 50,000 chin chunglam dawng tur tan chauh Document upload hi a ngai. Merit Scholarship dil tum tan erawh chuan Document upload ngai hi a awm nual a, hei hi Scholarship website ah en theih a ni.

School ah Document thehluh a ngai em? :

= Hei hi danah chuan zirlai ten an Scholarship an dil a an Application hi print out in a supporting document nen School-ah an thehlut tur a ni a, chu chu School thuneitu ten an lo verify ang a, a dik ngei em tih te an lo check ang a, a dik ngei tih an confirm hnuah School thuneitute chuan scholarship portal a Institution a lutin an naupang te chu an verify leh a ngai a ni.

Mahse hei hi tuna Mizoram a kan kal dan mekah chuan kan zawm \ha lo hle, Department lam hian information leh kaihhruaina mumal tak School te an pe lo bawk nen. School \henkhat chuan tu emaw mimal kutah an dah a, a verify zawng zawng nen an khawih tir vek mai niin a lang. Hei hi thil pawi tak awm thei a ni. A diltu ten School verification id te an kuta a awm anih phei chuan School hotute hriat lem lohin an dilsaka te school hming khan an naupang ni lem lo pawh thun theihna kawng tam tak a awm, fimkhur a ngai hle.

Tin, a diltu \henkhat chuan naupang te Income, Tribal leh Residential Certificate te man chawiin an lak tir a, hei hi Income Certificate bak hi chu a \ul lem lo. Mi harsa tak tak Scholarship diltu te pawisa sen thlawn tirna mai mai a ni, heng Certificate zawng zawng hi School level a tawp vek anih avangin Mizoram angah chuan kan mamawh lem lo. Tin, School thuneitute hian kan zirlai naupang te kan hrechiang hlawm a, Residential leh Tribal te Scholarship dil dawn a laktir kher a ngai lo. Scholarship dil nan Document engmah upload a ngailo kan tih tawh kha.

Scholarship dilna tur hian Bank Account neihna tur thlan bik a awm em? :

= Scholarship dil tur hian Student ten Bank Account an hawnna tur thlan bik a awm lova. Mahni duhna Bank-ah Account hi hawn mai tur a ni. Amaherawh chu Core Banking Facilities nei Bank-ah Account hi hawn tur a ni. Pre-Matric te tan chuan Bank Account holder hmingah anmahni a nih loh pawhin an nu leh pate emaw, anmahni chawmtu nen emaw Joint Account in hawn theih a ni a, Post-Matric te tan chuan anmahni hming ngeiin Bank Account hi hawn tur a ni.

Scholarship dil nan Aadhaar neih ngei ngei a ngai em? :

= Sawrkar thuchhuahah Aadhaar hi compulsory a ni lova, amaherawh chu Scholarship dil nan hi chuan Aadhaar neih a ngai a, Aadhaar number an nei thei nganglo anih chuan heng te hi Aadhaar aiah identification atan pawm a ni - Aadhaar nei tura a in enroll na ID, Bank Passbook account holder thlalak chuang, Ration Card, Pan card, Passport, Student id School hotu in a signed hnan leh seal chhut hnan, driving license.

Scholarship dil nan application form khawi atanga lak tur nge? :

= Online Scholarship dil nan hian application form a hranpa in a awm lova, scholarship website, www.scholarships.gov.in ah luhin online in fill up mai tur a ni. Online a fill up turin heng te hi hriat a ngai - Hming, Nu leh Pa hming, Address, Pianni thla leh kum, Phone no, Bank Account neihna Bank hming, Bank Account no, Bank IFSC No, Aadhaar no, Class zat, Kum hmasa a Class zat, kum hmasa a Pass percentage (50% hnuailam tan dil theiloh), Family Annual Income (Rs. 100,000/-for Pre Matric, Rs. 200,000 for Post Matric, aia sang kum khata lalut tan dil theihloh), Admission fee,Tuition fee.