Health Minister Lalrinpuii hovin DHS leh NHM District Office-te hnathawh dan thlirhona neih a ni

Health Minister Lalrinpuii hovin nimin khan Directorate of Health Services (DHS) leh National Health Mission (NHM) hnuaia District Office hrang hrangte hnathawh dan thlirhona neih a ni.

SAD Conference Hall No. I-a he thlirhona ah hian Health & Family Welfare Department Minister Lalrinpuii chuan Mizoram chhunga Health indicator hrang hrangte hmasawnna chu District hrang hranga Senior CMO, CMO, Doctor, Nurse leh Health Worker-te thawhrimna leh inpekna vang a nih thu sawiin, District tinah Monitoring leh Supervision tih chak a, District Level Review Meeting regular taka nei thin tur leh Programme Data uluk taka thlir chunga hma la zel turin he huna tel te chu a chah a. Deputy Commissioner-te nen thawhhona tha neih a pawimawh thu sawiin, District Administration-ah Regular Staff leh NHM Contractual Staff-te inkara thawhhona tha siam tur leh Field-a thawktute harsatna ngaihsak turin a fuih bawk a ni.

Health Minister chuan nau chunga nu thihna (Maternal Death) leh nausen thihna (Infant Death) thlengte chu uluk taka bawhzui a, programme hrang hrang hmalaknaah nu leh nausen thi chungchangah uluk taka chhui a, thihna titlem lehzual tura hmalak chhunzawm zel tur a nih thu a sawi a. TB programme chu Elimination Phase-a a luh tawh avangin Screening leh Treatment-ah tan lak thar leh a ngaih thu a sawi bawk.

He thutkhawm hi Health & Family Welfare Department-a Addl. Secretary Lalnunmawii chuan kaihruaiin Nu leh nau hriselna chungchangah District tam zawkah damdawi In-a nau neih (institutional delivery) 95% chunglam a nih thu leh Hnahthial District-ah kum khat chhungin Maternal Death an neih loh thu bakah Khawzawl District-in FY 2025–26 chhungin nu thi, nausen leh piang hlim thi an nei lo tih tarlan a ni a. Immunisation leh HPV chungchang ah District tam takin 95–100% Full Immunisation neiin Khawzawl chuan Mizoram-a a hmasa ber turin HPV Caccination 100% an tih thu tarlan a ni. Health facility tam takin National leh State NQAS Certification an dawn thu tarlan niin Aizawl East-in an District Hospital, PHC leh UPHC-ah 100% Certification an neih thu tarlan a ni a, Khawzawl District-in thla thum chhungin Administrative Health System din felin, Health & Wellness Centre zawng zawng Solar an vuah thu tarlan a ni bawk.