Chief Minister hovin Mi-PRAGATI thutkhawm nei

Nimin khan Chief Minister Lalduhoma hovin Mizoram Pro-Active Governance and Timely Implementation (Mi-PRAGATI) thutkhawm vawi thumna chu CM Conference Hall-ah neih a ni.

Mi-PRAGATI hi State chhunga hmasawnna hnathawh lian zualte vil a, harsatna an tawhte chinfel dan dappuitu leh a tul anga Department hrang hrang thawhhona tichak tura din a ni a. Sawrkar hnathawhte langtlang leh rang zawka kalpui zel dan ngaihtuahtu Committee thunei tak a ni bawk. Nimin-a thutkhawm ah hian NABARD RIDF sum hmanga Mizoram sawrkar hnathawh mek, Project amount cheng vbc. 3 aia tam chin Project 53 te ennawn niin hna kal muang zualte kal muan chhan tarlan a ni a, chak zawka hnathawh dan tur pawh sawi a ni.

Cheng vbc. 44,800 vel senga thawh tur Sairang - Hmawngbuchhuah Rel kawng ruahmanna chu Railways lamin an sawifiah a. He Rel kawng hi KM 224 vela thui, Station 20 awm tura duan a ni a. Thenzawl Rel Station awmna tura riruat tawh chu Thenzawl khua atanga a hlat deuh avangin Chief Minister hian hnai deuh zawka dah dan zawng tura hrilh tawhin nimin-a thutkhawm ah hian hnai deuh zawka dah an tum dan an tarlang.

Heng bakah hian Ropuiliani Tribal Freedom Fighter Museum sak mek chungchang te, State Tribal Institute sak mek te, PM SHRI hmalakna kal mek te, Swachh Bharat hmalakna te, Kaladan Multi Modal Transit Transport Project hmalakna te, PWD hnuaia hnathawh lian zualho, hnathawh timuang thei harsatna an tawh mekte leh project kalpui lai han enzui ngai bikte an sawiho bawk a. An harsatnate chinfel dan tur an sawiho nghal zel bawk a. Home Minister K. Sapdanga bakah Minister thenkhat, Chief Secretary leh Mizoram chhunga Project lian thawktu Central Agency te an tel bawk a ni.