ASUMP atanga lei Mizoram Police te hman tur lirthei 219 te Chief Minister in a vailiam
Nimin-a Motor vailiamna hunah hian Chief Minister Lalduhoma chuan Central sawrkar Scheme, Assistance to State & UTs for Modernisation of Police (ASUMP) atanga sum kan hmuh zawng zawng chu State share-te nen cheng vbc. 44.53 a ni tih sawiin, heng zinga cheng vbc. 30.45 chu lirthei lei nan bik hman a nih thu leh a dang chu Police thuamchakna hmanraw thar chi hrang hrang lei nana hman a ni tih a sawi a. “Technical thila harsatna kan neih avangin Mizoram hian Police Modernisation Scheme hi kum 2021 atang khan kan dawng tawh lova. Kan sawrkarah kan han hmu thar leh ta hi a lawmawmin a chhinchhiahtlak a. Kan Home Minister leh a thawhpuite chungah hian kan lawm hle a ni,” tiin “Kum 2017 atang khan ASUMP atanga lirthei lam chi lei hi Central sawrkar hian a rawn khap a. Kan Police ten lirthei lamah harsatna an tawk chho a. Assembly House lamah te pawh sawi rik a ni thin a. Kan mamawhziate uar taka sawi chungin, nikum khan Action Plan kan thehlut a. Kan DGP Pu Sharad Agarwal hian theihtawp chhuahin a bawhzui a. Hun rei tak an lo phal tawh loh thil kha min rawn phalsak ta a ni,” a ti bawk.
Chief Minister chuan kar hmasa a Union Home Minister Amit Shah nen an inkawmna chungchang pawh sawiin, “NE State dang zawng zawngten Security Related Expenditure an dawn laiin Mizoram-in hian kan dawng ve lova. Cyber Crime dona tur leh Drugs tawlhruk dona atana kan hman ve tur SRE Fund hi min pe ve turin ka dil a. ‘PM DevINE lamah project rawn thehlut zawk la, ka lo bawhzuisak ang che’ min lo ti a. Tin, raltlante chhawmdawlna pawh ka dil leh a, chu pawh chu buhfai cheng vbc. 10 man min pek leh tur thu min hrilh a. Home Ministry hian kan harsatnate hi min hrethiam a, kan lawm thin hle a ni,” tiin tun tuma lirthei thar dawngtute chu an lirtheite duat tak enkawl tura chahin, an lirthei dawnte hun rei tak hman theih tum turin a chah bawk.
Lirthei vailiamna hunah hian Home Minister K. Sapdanga pawhin Mizoram Police te thawhrimna ah lawmthu sawiin, lirthei tharin an nitin hnaah awlsamna tam tak a thlen a beisei thu a tarlang a. “Kan Police te thuamchak hi kan ram himna thuamchakna leh khawtlang nuam neihna a ni tih kan hria a. Thuam chak zel kan tum a ni,” a ti a. Mizoram DGP Sharad Agarwal IPS pawhin lirthei thar neih duhna ngawr ngawra he hmalakna hi kalpui an nih loh thu leh hnathawh tha zawk an neih theih nana inthuamchakna, tunlai changkanna umpha tura inbuatsaihna a ni tih a sawi a ni.
Tun tumah hian lirthei 219 semchhuah tur niin tunah hian ala rawn thleng kim lo a, heng lirthei te hi boruak tichhe lo chi (eco-friendly) Electric Scooter 15 leh Motorcycle (160 cc) 21; Light Motor Vehicle (LMV) 96 (Scorpio N (4x4), Bolero Neo, Bolero B6, leh Bolero Camper); Heavy Motor Vehicle (HMV) 18; Medium Motor Vehicle (MMV) 30 leh MMV Bus 24; Tui phurhna (Water Tanker) 5, Tâng phurhna motor (Prison Van) 3 leh Z+ Category VVIP Security duty atana hman tur Bullet-Resistant Toyota Fortuner 3 bakah Traffic leh tul dangah pawh hman tur motor hnuhna (Towing truck) 4 te a ni. Mizoram-a Police Station awm zawng zawng 44-te chuan Light Motor Vehicle thar an dawng vek dawn a, Police Out-Post awm zawng zawng 15 ten Light Motor Vehicle pakhat tal an dawng vek dawn a, Armed Police Battalions, Specialized Units, District Executive Forces (DEFs) leh PTS te pawhin lirthei hi an dawng dawn a ni.