MNF Party chu sawrkar leh turin a inbuatsaih leh mek - Zoramthanga

MNF President Zoramthanga chuan MNF Party chu sawrkar leh turin a inbuatsaih leh mek tih a sawi.

Nimin a MNF Party in Hnam Run-a Chhung Inkhawm an neih ah MNF President Zoramthanga chuan Mizoram in remna a neih chu Pathian pek a nih thu sawiin, “Pathian in remna min pek hi min ninhlei pek a ni lo. Remna chanchin tha hril zel tur leh a chanchin tha kan hrilh zel theih nan Mizote hi Pathian in remna min pe a ni,” a ti a. “Khawvel in remna hlutzia an hre zel a, MNF pawh remna thlen turin kan tangkai zia midangin an hre zel a ni,” a ti. MNF President chuan MNF chungchang sawiin, “MNF hian a hranpain ropuina bik kan nei lo a, kan danglamna bik erawh chu ‘Pathian leh kan ram tan’ titu kan nihna hi a ni. Chanchin tha hril turin he hnam Pathian tana buatsaih hi MNF tum ber a ni reng dawn a. Hniam chang nei thin mah ila, Lalpa nghak tlattu leh Pathian-a innghat tlat kan nihna hi a lang thin a. Lalpa’n min chawisang leh thin,” a ti a. “MNF Party chu sawrkar leh turin a inbuatsaih leh mek a. Chumi atan chuan a tul ang angte buaipui chhoh mek zel a ni. MNF-ah nghet takin, Pathian ring chungin i awm zel ang u,” a ti bawk.

He hunah hian MNF President hian tunhnaia Delhi a zin report pein Union Home Minister Amit Shah leh mi pawimawh tak tak a hmuh thu a sawi a ni.