Mizoram in infrastructure tha leh lian din nan EAP a hmang tangkai tih Chief Minister in a sawi
Sawrkar laipui-a Department of Economic Affairs, Ministry of Finance buatsaihin nimin khan Shillong-ah ‘Leveraging Externally Aided Projects (EAPs) in the North Eastern State’ tih thupui hmangin Seminar/Workshop neih a ni a, he hun hi Union Finance Minister Nirmala Sitharaman-i chuan kaihruaiin India Hmarchhak State-a Chief Minister zawng zawngte leh State tin atanga official pawimawhte telin Chief Minister Lalduhoma pawhin he hunah hian thu a sawi a. Chief Minister chuan Externally Aided Projects (EAPs) kaltlang hian ram dang atangin mithiam tak tak ten Mizoram-a hmalakna an rawn enpui thin tih sawiin, “Kan harsatnate an rawn zir a, an thiamna leh tawnhriatte min hrilh thin a. Hei hi kan hlawkpui hle,” a ti a. “Mizoram hi Hmarchhak State zinga EAP liantham dawng hmasa pawl kan ni a, Aizawl - Thenzawl - Lunglei World Bank Road kan nei a. ADB Fund hmangin kawngpui dang pawh kan lai a, ramri lam inkalpawhna tichak turin Mizoram State Roads-II Project kan nei a, Urban Infrastructure te, Water Supply tihchangtlunna te, sawrkar sum enkawlna tihchangtlunna Public Resource management Programme chenin kan thawk,” a ti.
Heng bakah hian Agriculture lamah IFAD kaltlangin FOCUS kalpui a nih thu pawh Chief Minister chuan sawiin, “FOSUS zarah hian chhungkaw 55,000 te chu an sum lakluh 43% zetin a pung a, leilung venhimna lamah hma kan sawnpui bawk a. Hriselna lamah World Bank puihna in Health System Strengthening Project kan kalpui a, sawrkar enkawl hriselna hmunhma (Centres/Hospital) 62 zet chu NQAS Certified an nih phah a. He project kal kalpui hma hian Mizoram in NQAS Certified Centre leh Hospital kan la nei ngai l. JICA sum hmangin Super Speciality Cancer Centre kan sa mek a, ADB Fund rinchhanin Universal Health Care Scheme kan kalpui mek bawk a. Energy lama intodelh tumin New Development Bank Fund hmangin 24 MW Tuirini HEP bul kan tan leh tawh bawk,” tiin EAP sum hmanga hmalakna te a tarlang a ni.
Chief Minister chuan Externally Aided Projects (EAPs) te hi infrastructure tha leh lian tham tak tak neih nan kan hmang tih sawiin, “Project tam zawk hmuh theih kan mamawh hle a, Hmarchhak Bial tana kan hmuh theih zat tam zawng bithliah (EAP Ceiling) pawh hi min tihsansak ula kan duh a ni,” a ti bawk.
He Seminar hi EAP kalpuina kawnga Hmarchhak Bialte thuamchakna (capacity building) leh an tawnhriatte inhrilhtawnna (experience sharing) atana buatsaih a ni a. Kum engemaw zat kaltaa State hrang hranga EAP kalpui tawhte thlirletna neih a nih bakah Externally Aided Project tha zawk, ram tana chhawr nahawm zawk duang chhuak zel tura inrawnkhawmna a ni nghal bawk.