Aadhaar Update man lak chungchang Bawrhsap-ah thlen

Serchhip District Consumers Association chuan zirlai naupangte hnena dan kalha Aadhaar Update-na man lak a awm nia sawi chu titawp tura hma la turin nimin khan Serchhip District Bawrhsap hnenah an thlen.
Thudawn danin School Education Department hnuaia Serchhip District-a Zirlaite Aadhaar update hna thawktute chuan tunlai hian School hrang hrang kalin Aadhaar update hna thawkin zirlai naupang pakhat ah Rs. 100 zel an la tih report chu Consumers Association hruaitute hian an dawng a. An zirchianna ah Rs. 100 an laksak lai hian Receipt-ah chuan Rs. 0 a inziak thung niin an sawi.

District Consumer Association hruaitute chuan Aadhaar update chungchangah hian India ram puma thuneitu UIDAI chuan dan mumal tak siamin, naupang kum 5-7 leh kum 15-17 inkara Aaahdar update tan hian pawisa chawi a ngailo a. Hemi in a tarlan bak kum a update te chuan an chawi thin a. Mahse Central lam hian Aadhaar Update hi a ngaih pawimawh avangin nikum October 1 atang khan naupang kum 5-17 inkar Aadhaar Update hi a thlawn vek turin thuchhuah a siam a. Hetiang anih laia Zirtirtu leh Education Department-a thawk sawrkara hlawh la zawk ten dan kalh a naupang hnenah Aadhaar update man an la lehzel chu a dik an tih loh thu an sawi a. Hemi chungchang ah hian District Education Officer pawh an biakpawh tawh thu leh ani chuan Aizawl lama hotute thurawn anga kal an nih a sawi thung tih an sawi a ni. Serchhip District Consumer Association hruaitute chuan Serchhip District-ah chuan dan kalha chet an remtihloh thu leh mipui chu an chanvo sawrkar in a ruatsak dik taka an chan theih nan hma an lak zui zel tur thu an sawi bawk.