SIR-2026 kalpui mekah Serchhip District-ah Enumeration Form Digitization hna zawhfel a ni ta
Serchhip Bawrhsap leh District Election Officer Paul L. Khuma hian nimin khan Serchhip DC Meeting Hall-ah thuthar thehdarhtute kawmin Special Intensive Revision neih meka an hmalakna te a tarlang a. District Election Officer chuan SRI 2026-ah hian May 26, 2026 khan Booth Level Officer (BLO) te hnenah Enumeration Form chu semchhuah tan niin June 6, 2026 hmaa sem zo vek tura tih a ni chungin June 4, 2026-ah sem zo vekin Serchhip District chu Mizoram-a Enumeration Form sem zo hmasa ber District a lo nih tawh thu a sawi a. Hemi hnu hian BLO ten Enumeration Form an semchhuah hi lakhawm lehin Digitized nghal a ni a, District ten Digitization Report an thehluh hmasak ber tum, June ni 8-ah Serchhip District chu 6-na niin thawktu hrang hrang ten ngawrh taka hma la zuiin Election Commission of India (ECI) in June ni 28-ah Enumeration Form Digitization hi zo tura a ruahman chungin nizan hmasa dar 8:16 khan zawhfel a nih thu a sawi a, portal-ah zan dar 10:00-ah reflect niin Champhai District nen June 17 zan khan zawhrual a nih thu thu a sawi bawk.
Bawrhsap chuan SIR 2026 kalpui mek a hlawhtlin theih nana a sur a sa hnuaia thawktu hrang hrang - Election Branch-a thawkte, Serchhip District chhung Assembly Bial pathum-a ERO, AERO, BLO Supervisor, BLO, BLA leh Media-te bakah Kohhran, Khawtlang hruaitu leh Tlawmngai Pawl te leh SIR buaipuitu zawng zawngte chungah lawmthu a sawi a ni.
He huna tarlan a nih danin Serchhip District-ah hian Vote nei 55,389 awmin heng mite hnenah hian Enumeration Form hi semchhuah niin mi 54,205 te chuan Enumeration Form hi thehlutin heng te hi digitized vek tawh a ni a, Enumeration Form laklet loh 1184 awmin Enumeration Form laklet hi za zela 97.86 niin laklet loh hi za zela 2.14 a ni.
Serchhip Election Officer Lalchhanhimi chuan Enumeration Form laklet loh te hi sawifiahin, an zinga 630 te chu mitthi tawh an nih thu leh midang 214 te chu hmundanga pem tawh, rawn kir tawh lo turte an ni tih a sawi a. Mi 168 te chu hming chuang nawn palh leh hmundanga awm zui zawk thlang te niin mi 139 te chu an chanchin chhui zui theih tawh loh te an nih thu leh mi 33 te chu Sakhuana leh chhan dang avanga Electoral Roll a awm zui duh tawh lo te an nih thu a sawi bawk.
Serchhip District Election Officer Paul L. Khuma chuan ECI in ruahmanna a siam angin tun thla ni 28 thlengin SRI 2026 atan hian Enumeration Form thehluh hun ala awm tih sawiin, hemi hun chhung hian Enumeration Form thehlut lo te hi a theih ang anga BLO leh BLA te nen chhui zui-a hmalak a la nih dawn thu a sawi a. July ni 4-ah Draft Roll tihchhuah tur niin Aug. ni 4 thlengin Draft Roll a sawisel duh nei leh dilna hrang hrang thlen duhte tan hun hawn a ni ang a, heng dilna te hi Sept. ni 2, 2026 thlengin chinfelna hun hawn niin September ni 6, 2026-ah Final Roll tarchhuah a nih tur thu a sawi bawk.